17928
काजू अनुदान अटींबाबत पणनमंत्र्यांशी चर्चा

दीपक केसरकर ः अर्ज करण्याचे बागायतदारांना आवाहन

सकाळ वृत्तसेवा
सावंतवाडी, ता. ९ ः काजूला प्रतिकिलो १० रुपये अनुदान मंजूर केले आहे. हे २७९ कोटी रुपयांचे अनुदान घेण्यासाठी अर्ज करावा. जीएसटी अट शिथिल करून गुमास्ता परवाना असलेल्या काजू व्यापाऱ्यांच्या खरेदी पावतीवर अनुदान देण्यासाठी पणनमंत्री अब्दुल सत्तार यांच्याशी चर्चा केली आहे. त्यामुळे अर्ज दाखल करावे, असे शालेय शिक्षण व मराठी भाषा मंत्री दीपक केसरकर यांनी काजू बागायतदारांशी चर्चा करताना सांगितले.
येथील प्रांताधिकारी कार्यालयासमोर आज काजू बागायतदार ठिय्या आंदोलनाला बसले होते. त्यांची मंत्री केसरकर यांनी भेट घेत चर्चा केली. यावेळी शेतकरी संघटनेचे अध्यक्ष वसंत उर्फ अण्णा केसरकर, जयप्रकाश चमणकर, संजय देसाई, सुरेश गावडे, दिवाकर म्हाळवणकर, प्रवीण परब, आकाश नरसुले, भीमराव देसाई, विश्वनाथ राऊळ, संजय लाड, विष्णू सावंत, उल्हास देसाई, शांताराम गावडे, प्रदीप सावंत, जगदेव गवस, कृष्णाजी कोठावळे व शेतकरी उपस्थित होते.
काजू बागायतदारांनी, जीएसटी अट शिथिल करून अनुदान वाटप करण्यात यावे, अशी मागणी केली होती. सामाईक जमिनीमधील लाभार्थीचे हमीपत्र घेण्याचा निर्णय यापूर्वीच केसरकर यांनी मंजूर करून घेतला आहे. आज त्यांनी जीएसटी अट शिथिल होईल, असे सांगून गुमास्ता परवाना असलेल्या काजू व्यापाऱ्यांच्या खरेदी पावतीवर अनुदान मंजूर केले जाईल, असे मंत्री सत्तार यांनी आश्वासन दिले असून, तसे पत्र मंत्र्यांनी दिले आहे, असे त्यांनी सांगितले.