यादीतून नाव वगळल्यास
पुन्हा नोंदणी अत्यावश्यक
जिल्हाधिकारी पाटील ः मतदारांना आवाहन
सकाळ वृत्तसेवा
सिंधुदुर्गनगरी, ता. १७ ः ज्यांची नावे यादीतून डिलिट झाली आहेत, ते मतदार मतदान केंद्रावर फॉर्म क्र. १७ भरून आणि आपले मतदान कार्ड दाखवून मतदान करू शकणार आहेत. ज्यांची नावे मतदार यादीमध्ये दिसत नाहीत, त्यांनी मतदान केंद्रावर येऊन वरील प्रक्रिया करून मतदानाचा हक्क बजावावा, अशा प्रकारचा चुकीचा संदेश पसरवला जात आहे. मात्र, मतदाराचे यादीमधून नाव वगळल्यास त्याला मतदान करता येत नाही. अशावेळी मतदाराने आपल्या नावाची नव्याने मतदार यादीमध्ये नोंदणी करणे आवश्यक आहे. मतदारांनी कोणत्याही चुकीच्या संदेशाला बळी न पडता आपल्या नावाची नोंदणी करावी, असे आवाहन जिल्हाधिकारी अनिल पाटील यांनी केले आहे. अनेक दिवसांपासून समाजमाध्यमांवर चुकीचा संदेश व्हायरल होत आहे. या संदेशामुळे नागरिकांमध्ये संभ्रम निर्माण झाला आहे. मतदान यादीमधून मतदाराचे नाव वगळल्यास मतदान करता येत नाही. अशावेळी मतदाराने आपल्या नावाची नव्याने मतदार यादीमध्ये नोंदणी करणे आवश्यक आहे. नाव नोंदविण्यासाठी नामनिर्देशनच्या शेवटच्या दिवसापर्यंत मतदाराला संधी असते, त्यानंतर मतदार यादीमध्ये नाव नोंदविता येत नाही. त्यामुळे सध्या ज्या मतदाराचे नाव मतदार यादीमधून वगळले आहे, त्यांना २० नोव्हेंबरला मतदानाचा हक्क बजावता येणार नाही.
त्यामुळे समाज माध्यमांवर व्हायरल होणारा संदेश चुकीचा असून, नागरिकांनी अशा चुकीच्या संदेशावर विश्वास ठेवू नये. तसेच असा संदेश इतरांनाही पाठवू नये, असे आवाहन जिल्हाधिकारी पाटील यांनी केले आहे.