46065

मिठबाव येथील शिबिरात
६० जणांची दंत चिकित्सा

सकाळ वृत्तसेवा
तळेरे, ता. १८ : मिठबाव येथील जीवन शिक्षण शाळा क्र. १ मध्ये दिविजा वृद्धाश्रमार्फत मोबाईल दंत चिकित्सा शिबिर आयोजित करण्यात आले. या शिबिरात ६० जणांची दातांची तपासणी करण्यात आली. शिबिराचे उद्‍घाटन उपसरपंच सौ. फाटक व डॉ. मेहुल जाधव यांच्या हस्ते दीपप्रज्वलन करून करण्यात आले.
असलदेतील स्वस्तिक फाउंडेशन संचलित दिविजा वृद्धाश्रमाकडून या वृद्धाश्रमातील आजी-आजोबांसह गोर-गरिबांसाठी विविध ठिकाणी अनेक उपक्रम आयोजित केले जातात. खेड्या-पाड्यांतील गोरगरीब जनतेला दातांचे उपचार करणे पैशाअभावी शक्य होत नाही. ग्रामीण खेड्या-पाड्यात दंत चिकित्सा दवाखाने नसल्याने दातांचे इलाज करणे वयोवृद्ध लोकांना शक्य होत नाही. अशा लोकांच्या सेवेसाठी दिविजा वृद्धाश्रमाने त्यांच्यापर्यंत पोहोचण्यासाठी मोबाईल दंत चिकित्सक शिबिराचे आयोजन केले होते. या कार्यक्रमाचे आयोजन संस्थेचे सेक्रेटरी संदेश शेट्ये व अविनाश फाटक यांनी केले. मुंबईहून डॉ. किसन गारगोटे, डॉ. ऋतिक गारगोटे यांनी रुग्णाचे उपचार केले. संस्थेचे सदस्य संजय धवन यांचे सहकार्य मिळाले. या कार्यक्रमास मिठबाव गावचे ग्रामस्थ व दिविजा वृद्धाश्रमामधील कर्मचारी उपस्थित होते.