४६१२५

दापोलीत लवकरच शिवसेनेचा नगराध्यक्ष
राज्यमंत्री योगेश कदम : पाच नगरसेवकांचा प्रवेश; विकासासाठी पाठीशी राहणार
सकाळ वृत्तसेवा
दापोली, ता. १८ : नगरपंचायतीच्या निवडणुकांवेळी शिवसैनिकांनी केलेला संघर्ष आज फळाला आला आहे. आज या पाचही नगरसेवकांनी आमच्यावर विश्वास ठेऊन शिवसेनेत प्रवेश केला आहे. त्यामुळे लवकरच नगरपंचायतीत शिवसेनेचाच नगराध्यक्ष होईल, असे राज्यमंत्री योगेश कदम यांनी सांगितले.
राज्यमंत्री योगेश कदम यांच्या वाढदिवसानिमित्त दापोलीतील अन्वर रखांगे, विलास शिगवण, मेहबूब तळघरकर, अश्विनी लांजेकर, संतोष कळकुटके या पाच नगरसेवकांनी वेगळा गट करून मंगळवारी (ता. १८) शिवसेनेमध्ये प्रवेश केला. राज्यमंत्री कदम यांनी त्यांचे स्वागत केले.
ते म्हणाले, ‘नगरपंचायतीच्या निवडणुकीवेळी शिवसैनिकांनी संघर्ष केला होता. त्या वेळेस जो अन्याय झाला त्याला वाचा फोडण्याचे काम शिवसैनिकांनी केले. मात्र, त्यावेळी नगरपंचायतीमध्ये सत्ता स्थापन करू शकलो नाही. त्यावेळी निवडून आलेले आपले दोन अपक्ष नगरसेवक आज नगरपंचायतीमध्ये आहेत. आज या पाच जणांनी आमच्यावर विश्वास ठेऊन शिवसेनेत प्रवेश केला आहे. त्यामुळे दापोलीचा पुढील नगराध्यक्ष शिवसेनेचाच होईल. दापोली शहराचा जो विकास थांबला आहे तो होणे आवश्यक आहे. निधी मिळून विकासकामांना सुरुवात करणे गरजेचे आहे. उपमुख्यमंत्री एकनाथ शिंदे यांच्या माध्यमातून तसेच महायुतीच्या माध्यमातून एकजुटीने या शहराचा विकास करायचा आहे. त्यासाठी मंत्री म्हणून नेहमीच तुमच्या पाठीशी उभा आहे.’’

कोट
ज्या वेळी आम्ही उद्धव ठाकरे यांच्या शिवसेनेत प्रवेश केला, त्यावेळी आम्हाला वाटले की, कुठेतरी आमच्या विभागामध्ये कामे होतील; परंतु आजपर्यंत एकही काम झालेले नाही. राज्यमंत्री योगेश कदम यांच्या तालुक्यातील कामांचा झपाटा पाहून आम्ही ठरवले की, आपल्या विभागाचा विकास व्हायचा असेल तर त्यांच्यासोबत गेले पाहिजे. म्हणून कोणतीही अपेक्षा न ठेवता विकासकामांसाठीच शिवसेनेमध्ये प्रवेश केला आहे.
- विलास शिगवण, नगरसेवक, दापोली नगरपंचायत