अश्विनी करकरे देणार महिलांना
दागिने तयार करण्याचे प्रशिक्षण
इन्फिगो फाउंडेशन; उद्यापासून साळवी स्टॉप येथे आयोजन
सकाळ वृत्तसेवा
रत्नागिरी, ता. ४ : इन्फिगो फाउंडेशनने सामाजिक जाणिवेतून रत्नागिरीमध्ये आधुनिक ज्वेलरी तयार करण्याचे प्रशिक्षण शहरी व ग्रामीण भागातील महिलांसाठी खास आयोजित केले आहे. मुंबईच्या सुप्रसिद्ध डिझाईन व ज्वेलरी मेकर अश्विनी करकरे या प्रशिक्षण देणार आहेत.
गुरुवारी (ता. ६) रोजी सकाळी ११ ते ६ या वेळेत शहरी महिलांसाठी तर शुक्रवारी (ता.७ ) रोजी सकाळी १० ते ५ या वेळेत ग्रामीण भागातील महिलांसाठीचे हे प्रशिक्षण साळवी स्टॉप येथील इन्फिगो आयकेअर हॉस्पिटल येथे होणार आहे. आजकाल विविध प्रकारची ज्वेलरी बाजारात उपलब्ध आहे. मुली, महिलांना अशी आकर्षक ज्वेलरी फार आवडते. अनेकांना अशी आधुनिक ज्वेलरी स्वतः करायची इच्छा असते. हाच मुद्दा विचारात घेऊन इन्फिगो फाउंडेशनने या प्रशिक्षणाचे आयोजन केले आहे.
शहरी महिलांसाठी फक्त १०० रुपये तर ग्रामीण महिलांसाठी ५० रुपये नोंदणीशुल्क आहे. यामध्ये लागणारे विशेष प्रकारचे साहित्य इन्फिगो फाउंडेशनतर्फे देण्यात येणार आहे याशिवाय स्वतः तयार केलेला बांगड्या, हार व कानातले असा संच प्रत्येकीला मिळणार आहे तोही मोफत. पाचजणींच्या गटाने नोंदणी केल्यास गटाला कात्र्यांचा एक संच मोफत मिळणार आहे. चहा, नाश्त्याची सोय करण्यात आली आहे. मुंबईच्या सुप्रसिद्ध डिझाईन व ज्वेलरी मेकर करकरे ज्वेलरी शिकवणार आहेत. नोंदणी करणाऱ्यांना कार्यक्रमाविषयी अधिक तपशील वैयक्तीक कळवण्यात येईल. अधिकाधिक महिलांनी प्रशिक्षणाचा लाभ घ्यावा, असे इन्फिगो फाउंडेशनतर्फे आवाहन करण्यात येत आहे.