50644

आरोंदा रस्ताप्रश्‍नी प्रसंगी आंदोलन

कांबळींचा इशारा ः मंजूर काम सुरू न झाल्याने संताप

सकाळ वृत्तसेवा
सावंतवाडी, ता. १२ ः कोंडुरा तळवणेमार्गे आरोंदा रस्त्याचे काम दोन दिवसांत सुरु न झाल्यास सार्वजनिक बांधकाम विभागाच्या कार्यालयासमोर धरणे आंदोलन छेडणार असल्याचा इशारा भाजप युवा मोर्चाचे तालुका अध्यक्ष तथा तळवणे ग्रामपंचायत सदस्य सिद्धेश कांबळी यांनी दिला आहे. याप्रश्नी पालकमंत्र्यांचे लक्षही वेधणार असल्याचेही त्यांनी म्हटले आहे.
कोंडुरा तळवणेमार्गे आरोंदा या रस्त्याचे काम डिपॉझिट हेडमधून मंजूर आहे. या कामाची वर्क ऑर्डर होऊन दोन महिने उलटले तरीही ठेकेदार काम सुरू करत नसल्याने स्थानिकांमध्ये याबाबत तीव्र असंतोष व्यक्त होत आहे. या रस्त्याच्या बाजूने महाराष्ट्र जीवन प्राधिकरण विभागाने दोन वर्षांपूर्वी नळ योजनेसाठी जलवाहिनी टाकली होती. या कामामुळे हा संपूर्ण रस्ता नादुरुस्त झाला होता. त्यानंतर हा रस्ता डिपॉझिट हेडमधून मंजूर करण्यात आला. त्यासाठी फेब्रुवारीमध्ये वर्क ऑर्डरही काढण्यात आली. मात्र, बांधकाम विभागाकडून नेहमीच दोन दोन दिवसांची मुदत वाढवून घेतली जात असल्याचा आरोप श्री. कांबळी यांनी केला आहे. हा रस्ता वाहतुकीसाठी पूर्णपणे नादुरुस्त झाला असून यावर अनेक अपघात होत असतात.
---
बांधकाम विभागाची अनास्था
अपघातांची मालिका थांबविण्यासाठी या रस्त्याचे काम त्वरित होणे आवश्यक असताना सार्वजनिक बांधकाम विभागाच्या अनास्थेमुळे ते रखडले असल्याचा आरोपही कांबळी यांनी केला आहे. त्यामुळे आता दोन दिवसांत या रस्त्याचे काम सुरू न झाल्यास बांधकाम विभागाच्या कार्यालयासमोर धरणे आंदोलन छेडण्याचा इशारा त्यांनी दिला आहे. तसेच याबाबत पालकमंत्र्यांचे लक्ष वेधणार असल्याचेही श्री. कांबळी यांनी सांगितले.