कळंबणी रुग्णालयात
१८ ला आरोग्य शिबिर
खेडः तालुक्यातील कळंबणी उपजिल्हा रुग्णालयात १८ मार्चला सकाळी १० ते दुपारी २ या कालावधीत आरोग्य सेवा शिबिर आयोजित केले आहे. शिबिरात ०-१८ वयोगटातील विविध आजारांनीग्रस्त बालकांवर डेरवण येथील वालावलकर रुग्णालयातील तज्ञ वैद्यकीय अधिकाऱ्यांमार्फत तपासणी व उपचार तसेच आवश्यक बालकांवर मोफत शस्त्रक्रिया करण्यात येणार आहे. अंगणवाडीतील कुपोषित बालकांना खेड रोटरी क्लबमार्फत मोफत प्रोटीन पावडर, टॉनिक तसेच अन्य औषधांचे वाटप करण्यात येणार आहे.
----------------
संभाजी भिडे गुरूजींचे
साडवलीत व्याख्यान
साडवलीः श्री शिवप्रतिष्ठान हिंदुस्थान देवरूख विभागातर्फे साडवली येथील बने स्कूलच्या मैदानात २४ मार्चला सायंकाळी ५.३० वा. धर्मवीर बलिदान दिन या विषयावर संभाजी भिडे गुरूजी यांचे व्याख्यान होणार आहे. धर्मवीर छत्रपती श्री संभाजी महाराज यांच्या सहवासाने पावन झालेल्या संगमेश्वर धर्मभूमीमध्ये छत्रपती श्री संभाजी महाराजांचा इतिहास व त्यांचे बलिदान यामुळे जिवंत असलेल्या हिंदुस्थानचे वास्तव अनुभवण्यासाठी व धर्मवीर बलिदान मास म्हणजे काय हे जाणून घेण्यासाठी हिंदू बंधू-भगिनींनी अवश्य उपस्थित राहावे, असे आवाहन गणेश गायकवाड, श्रीधन बाळेकुंद्री यांनी केले आहे.
-----------
कडवई धामणाकवाडीत
जिल्हास्तरीय नृत्य स्पर्धा
साडवलीः संगमेश्वर तालुक्यातील कडवई धामणाकवाडी येथील संघर्ष मित्रमंडळातर्फे जिल्हास्तरीय नृत्य स्पर्धेचे आयोजन २० मार्चला रात्री ८ वाजता करण्यात आले आहे. स्पर्धा लहान गट (वय १ ते १५), मोठा गट (१६ ते पुढे) या गटात होणार आहे. विजेत्यांना रोख रक्कम व चषक देण्यात येईल. ज्या स्पर्धकांना या स्पर्धेत सहभागी व्हायचे असेल त्यांनी संयोग धामणाक, दिनेश गीते, नीलेश धामणाक, विनोद धामणाक यांच्याशी संपर्क साधावा, असे आवाहन मंडळाचे अध्यक्ष संजय धामणाक यांनी केले आहे.
---------
घरडा महाविद्यालयात
शोध कार्यक्रम
चिपळूणः खेड तालुक्यातील लवेल येथील घरडा अभियांत्रिकी महाविद्यालयात शोध २०२५ हा नावीन्यपूर्ण कार्यक्रम यशस्वीरित्या झाला. तंत्रज्ञान समुदायात नवोन्मेष, सहकार्य आणि ज्ञानाची देवाणघेवाण वाढवणे, ज्ञानाच्या सीमा ओलांडण्यासाठी आणि भविष्यातील प्रगतीला प्रेरणा देण्यासाठी एक व्यासपीठ उपलब्ध करून देण्याच्या उद्देशाने हा कार्यक्रम घेण्यात आला. कार्यक्रमात स्पीड प्रोग्रामिंग, लॅन गेमिंग, सर्किट मेकिंग, पोस्टर प्रेझेंटेशन, टाउन प्लॅनिंग, स्टार्ट-अप् आयडिया (बी-प्लॅन), प्रोजेक्ट प्रेझेंटेशन, पझल कट्टा, कॅड मॉडेलिंग, टेक्निकल क्विझ प्रेझेंटेशन यासारख्या विविध स्पर्धा घेण्यात आल्या. विजेते व उपविजेत्यांना पारितोषिकांसह प्रमाणपत्र व सर्व सहभागी स्पर्धकांना प्रमाणपत्र देण्यात आले.