जालगावमध्ये हॉर्नबिलच्या
पहिल्या घरट्याचा शोध
दापोली, ता. १२ः दापोलीत मलबार पाइड हॉर्नबिलच्या पहिल्या घरट्याचा शोध जालगाव येथे वाईल्ड अॅनिमल रेस्क्युअर संघटनेने लावला आहे. त्या घरट्याला संरक्षित करण्याचे काम संघटनेमार्फत सुरू आहे.
जालगाव येथील नंदकुमार झाडेकर यांच्या बहिणीच्या घराच्या बाजूच्या झाडावर हे घरटे सापडल्याचे वाईल्ड अॅनिमल रेस्क्युअर संघटनेचे सचिव तुषार महाडिक यांनी सांगितले. या पक्ष्याला मराठीत मलबारी कवड्या धनेश असे म्हटले जाते. हा पक्षी सदाहरित आणि पानगळीच्या जंगलात आढळतो; मात्र, जंगलाजवळील लहान नागरी भागातही झाडांवर आढलतो. मलबार पाइड हॉर्नबिलचा विणीचा हंगाम एप्रिल ते जून या कालावधीत असतो. हे पक्षी आयुष्यभरासाठी एकाच जोडीदारासोबत राहतात. अन्य धनेश पक्ष्यांप्रमाणे याची मादीदेखील स्वतःला झाडाच्या ढोलीत अंडी घालण्यासाठी बंद करून घेते. मादी १ ते ३ अंडी घालते आणि अंडी घातल्यापासून पिल्ले घरट्याबाहेर येण्यास ९० दिवसांचा कालावधी लागतो. या काळात नर तिला घरट्याच्या लहानशा फटीतून अन्न पुरवतो.