51110

करून होलिकेला नमन, करूया व्यसनांचे दहन!

कणकवलीत आदर्श होळी ः नशाबंदी मंडळ, पदर प्रतिष्‍ठानचा पुढाकार

सकाळ वृत्तसेवा
कणकवली, ता. १४ : ‘होलिकेला नमन करून व्यसनांचे दहन करूया’ असा संदेश देत येथे आदर्श होळीचे दहन केले. नशाबंदी मंडळ सिंधुदुर्ग आणि पदर प्रतिष्ठानने छत्रपती शिवाजी महाराज चौकात हा उपक्रम राबविला.
उत्सव आला की व्यसनही सोबत आलीच पाहिजेत असा रिवाज अलीकडे मोठ्या प्रमाणात सगळीकडे सुरू आहे. हा रिवाज मोडीत काढून व्यसनांना प्रतिबंध घालून आनंददायी उत्सव साजरा करावा या उद्देशाने शहरातील छत्रपती शिवाजी महाराज चौकात आदर्श होळी उपक्रम राबविण्यात आला.
कार्यक्रमात नशाबंदी मंडळ जिल्हा संघटक अर्पिता मुंबरकर म्‍हणाल्या की, ‘‘व्यसनमुक्त महाराष्ट्र, सक्षम महाराष्ट्र व्हावा, यासाठी व्यसनमुक्तीच्या कार्यात सामाजिक संस्थांनी सहभागी व्हावे. राज्यात सध्यस्थितीत व्यसनांची परिस्थिती भयावह आहे. सर्वांनी सहकार्य केले तरच व्यसनांना अटकाव करता येईल.’’
यावेळी अभिनेत्री अक्षता कांबळी आणि पदर प्रतिष्ठानच्या अध्यक्षा मेघा गांगण यांनी दारु, गुटखा, सिगारेट, अमली पदार्थ, गांजा, अफू, ड्रग्स, चरस यांची वेष्टणे, आवरणे या सर्व व्यसनांची प्रतिकात्मक होळी पेटवली. मेघा गांगण यांनी ‘‘व्यसनमुक्त समाज निर्माण करण्यासाठी आपण सर्वांनी प्रयत्न केले पाहिजेत,’’ असे आवाहन केले.
यावेळी नशाबंदी मंडळ अध्यक्षा अर्पिता मुंबरकर, महिला दक्षता समितीच्या रोजा खडपकर, पदर महिला प्रतिष्ठान सचिव सुप्रिया नलावडे, प्रियाली कोदे, लीना काळसेकर, संजना सदडेकर, साक्षी वाळके, अंकिता कर्पे, राजश्री रावराणे, संपदा पारकर, प्रणाली चव्हाण, भारती पाटील, शांती सावंत, मनीषा मयेकर, पल्लवी करपे, पूजा माणगावकर, गोसावी मॅडम, स्वानंदी कोदे, याज्ञवी कोदे उपस्थित होत्‍या.