डायलिसिस केंद्र
सुविधा देवरूखात
साडवली ः देवरूख येथे प्रथमच डायलिसिस केंद्र उपलब्ध होणार आहे. मातृमंदिर आणि चाळके किडनी फाउंडेशन यांच्या सहकार्याने अत्यल्प दरात ही सुविधा उपलब्ध होणार आहे. रविवारी (ता. २३) सकाळी ११ वाजता या सेंटरचे उद्‍घाटन आमदार शेखर निकम यांच्या हस्ते होईल. स्व. इंदिराबाई हळबे यांनी १९५४ साली दोन कॅाटच्या साह्याने सुरू केलेले मातृमंदिर हॅास्पिटल आता डायलिसिस सेंटरचे नवे दालन सुरू करत आहे. तालुक्यात डायलिसिसची गरज असणाऱ्या रुग्णांची संख्या वाढत आहे. त्यांना उपचार देणारी डायलिसिस यंत्रणा येथे नसल्याने येथील रुग्णांना रत्नागिरी अथवा चिपळूण येथे जावे लागत होते. परिणामी, डायलिसिस खर्चापेक्षा वाहतूक आणि वेळ अधिक खर्च होतो. या परिसरातील डायलिसिस सेंटरच्या नितांत गरजेचा विचार करून मातृमंदिरने चाळके किडनी फाउंडेशनच्या सहकार्याने हे सेंटर सुरू करण्याचा निर्णय घेतला आहे. येथे एकावेळी दोन मशिन कार्यरत राहणार आहेत.
---
लाटवण शाळेत
उद्यापासून कार्यक्रम
मंडणगड ः लाटवण पंचक्रोशी मराठी माध्यमिक विद्यामंदिरच्या सुवर्ण महोत्सवी वर्षानिमित्त लाटवण हायस्कूल माजी विद्यार्थी संघाच्यावतीने २२ व २३ मार्चला विविध कार्यक्रमांचे आयोजन करण्यात आले आहे. २२ मार्चला माजी विद्यार्थी क्रिकेट सामने, विद्यार्थ्यांसाठी डॉ. भूषण चव्हाण यांच्या माध्यमातून आरोग्य शिबिर, विद्यार्थ्यांचे वार्षिक स्नेहसंमेलन व स्नेहभोजनाचा कार्यक्रम होणार आहे. २३ला लाटवण हायस्कूल सुवर्ण महोत्सव मॅरेथॉन स्पर्धा, बक्षीस समारंभ, विद्यार्थी करिअर मार्गदर्शन, शिवव्याख्याते प्रशांत देशमुख यांचे व्याख्यान, गुरूजनांचा सत्कार, लाटवण हायस्कूल वाटचालीसंबंधी लघुपट व सांस्कृतिक समारंभ होईल. दोन दिवस चालणाऱ्या कार्यक्रमांच्या मुख्य स्वागत समारंभाला गृहराज्यमंत्री योगेश कदम, आमदार भाई जगताप, आमदार निरंजन डावखरे, आमदार ज्ञानेश्वर म्हात्रे, माजी आमदार संजय कदम आदी उपस्थित राहणार आहेत.
---
मिनरल वॉटर
प्रकल्प शिरगावात
मंडणगड ः सोवेली पंचक्रोशी सहकारी औद्योगिक वसाहतीच्या औद्योगिक क्षेत्र शिरगाव येथे विकास एंटरप्रायझेस यांच्या माध्यमातून उभारण्यात आलेल्या कोकण ऑक्सि या मिनरल वॉटर प्रकल्पाचे उद्‍घाटन करण्यात आले. या प्रकल्पाच्या माध्यमातून तालुक्यातील पहिला मिनरल वॉटर प्रकल्प सुरू झाल्याने येथील नागरिकांना तालुक्यातच तयार झालेले मिनरल वॉटर उपलब्ध होणार आहे. या वेळी संस्थेचे उपाध्यक्ष व कोकण ऑक्सि प्रकल्पाचे मालक विकास शेट्ये, उपनगराध्यक्ष वैभव कोकाटे, भाजपचे जिल्हा सरचिटणीस विश्वदास लोखंडे, अॅड. राकेश साळुंखे आदी उपस्थित होते.