पोकलेन चालकाची
मुरूड येथे आत्महत्या
दापोलीः तालुक्यातील मुरूड येथील जंगलात पोकलेन चालकाने गळफास घेऊन आत्महत्या केल्याची घटना उघड झाली आहे. दापोली पोलिसांनी दिलेल्या माहितीनुसार, मुरूडचे माजी सरपंच सुरेश शंकर तुपे यांनी मुरूड गावातील सडा येथे तलाव खणण्याचे काम घेतले होते. त्यासाठी त्यांनी भाड्याने एक पोकलेन घेतला होता. त्यावर राजू नामदेव पवार (वय ३६, रा. कुन्नूर, विजापूर) हा चालक म्हणून काम करत होता. १२ मार्चला सकाळी ९.३० च्या सुमारास या पोकलेनचा प्रेशर पाईप फुटल्याने तो आणण्यासाठी राजू पवार गेला होता तो परत आलाच नव्हता. २७ मार्चला सायंकाळी पाचच्या सुमारास तलावाचे खोदकाम सुरू असलेल्या ठिकाणासमोरील जंगलातून उग्र वास येत होता. त्यामुळे पोलिस पाटील व अन्य ग्रामस्थांनी तेथे जाऊन पाहिले असता त्यांना झाडाच्या फांदीला गळफास घेतलेल्या अवस्थेत एकजण आढळून आला. त्या व्यक्तीने परिधान केलेल्या कपड्यावरून व तेथे पडलेल्या पोकलेनच्या किल्लीवरून तो मृतदेह राजू पवार याचाच असल्याची माहिती तुपे यांनी दिली.