लांजात सुसज्ज रुग्णालय उभे करणार
नीलेश सांबरेः जिजाऊ शैक्षणिक, सामाजिक संस्थेचे कार्यालय सुरू
सकाळ वृत्तसेवा
लांजा, ता. २५ः तालुक्यात सुसज्ज रुग्णालयाचा अभाव आहे आणि म्हणूनच लांजा-रत्नागिरी येथील रुग्णांना उपचारासाठी कोल्हापूर किंवा मुंबईला जायला लागू नये, त्यांना याच ठिकाणी उपचार मिळाले पाहिजेत या दृष्टीने लवकरच या ठिकाणी सुसज्ज असे रुग्णालय उभे करण्याचा मनोदय जिजाऊ शैक्षणिक सामाजिक संस्थेचे संस्थापक अध्यक्ष नीलेश सांबरे यांनी लांजा येथे व्यक्त केला.
जिजाऊ शैक्षणिक, सामाजिक संस्थेच्यावतीने लांजा येथे सुरू करण्यात आलेल्या कार्यालयाचे उद्घाटन कार्यक्रम लांजा येथे पार पडला. या वेळी सांबरे हे बोलत होते. जिजाऊ शैक्षणिक, सामाजिक संस्थेच्यावतीने लांजा येथे कार्यालयात सुरू करण्यात आले असून, त्या ठिकाणी महिला, तरुणवर्ग, मुली यांच्यासाठी विविध कोर्सेस मोफत उपलब्ध करून देण्यात आले आहेत. त्याचप्रमाणे सापुचेतळे येथे मोफत पोलिस भरती प्रशिक्षण केंद्रदेखील सुरू करण्यात आले आहे.
सांबरे म्हणाले की, गेल्या १६-१७ वर्षापासून जिजाऊ शैक्षणिक व सामाजिक संस्थेच्या माध्यमातून आपण काम करत आहोत. आपला कोकणी माणूस जो सर्वचदृष्टीने आर्थिक, सामाजिक, राजकीय पुढे गेला आहे तो आपल्या समाजाला पुढे नेत नाही ही खंत आहे आणि म्हणूनच तुम्हा-आम्हाला, आपल्या प्रत्येक माणसाला पुढे घेऊन जायचे आहे.

कोट
मी जिल्ह्यात फिरत असताना पाहिले आहे या ठिकाणी सुसज्ज रुग्णालयाचा अभाव आहे. त्यामुळे येथील गोरगरीब रुग्णांसह सर्व रुग्णांना उपचारासाठी कोल्हापूर किंवा मुंबई येथे धाव घ्यावी लागते. आपल्याला हे सारे चित्र बदलायचे आहे. याच ठिकाणी कोल्हापूर, मुंबई दर्जाची आरोग्यसुविधा मिळावी, या दृष्टीने मी अशी व्यवस्था करणार आहे.
- नीलेश सांबरे