60044

मडुरा तिठा येथे ‘जय श्रीराम’चा नारा

श्री हनुमान मंदिराचे शिखर कलशारोहण

सकाळ वृत्तसेवा
बांदा, ता. २६ ः रोणापाल-मडुरा तिठा येथील दक्षिणाभिमुखी श्री हनुमान मंदिर शिखर कलशारोहण आणि मूर्ती पुनर्प्रतिष्ठापना सोहळा भाविकांच्या उपस्थितीत उत्साहात व भक्तिमय वातावरणात झाला. दाभोली मठाचे प. पू. दत्तानंद सरस्वती स्वामी महाराज यांच्या हस्ते शिखर कलश स्थापना व मारुती मूर्ती स्थापना करण्यात आली.
यावेळी ‘जय श्रीराम’च्या घोषणांनी परिसर दणाणून गेला. या सोहळ्यानिमित्त गुरुवारी (ता. २४) सकाळी होमहवन व विविध धार्मिक कार्यक्रम, सायंकाळी रामकृष्ण हरी संगीत गुरुकुल, तेंडोली यांचा ‘गीत रामायण’ हा कार्यक्रम झाला. शुक्रवारी (ता. २५) सकाळी ८.३० च्या मुहूर्तावर दाभोली मठाचे प. पू. दत्तानंद सरस्वती स्वामी महाराज यांच्या हस्ते शिखर कलश स्थापना पार पडली. त्यानंतर ९ वाजता मारुती मूर्ती स्थापना, प्राणप्रतिष्ठा झाली. यावेळी स्वामींची पाद्यपूजा, महापूजा, तत्वहोम, पूजांगहोम, क्षेत्रपाल बलिदान, महापुर्णाहुती, दुपारी महानैवेद्य, आरती, मंत्रपुष्पांजली, प्रार्थना, ब्राह्मण पूजन, आशीर्वाद व महाप्रसाद हे कार्यक्रम झाले. सायंकाळी जय संतोषी माता दशावतार मंडळाचा नाट्यप्रयोग झाला. या सोहळ्यासाठी भाविकांची अलोट गर्दी झाली होती. सोहळ्याचे श्री हनुमान देवस्थान समितीमार्फत नीटनेटके आयोजन करण्यात आले होते. मंदिर परिसरात फुलांची आकर्षक सजावट व विद्युत रोषणाई करण्यात आली होती. मुंबई, पुणे, गोवा येथील चाकरमान्यांसह मडुरा दशक्रोशीतील हजारो भाविक सोहळ्यात सहभागी झाले.