दिगवळे रांजणवाडीत
हरिनाम सप्ताह सोहळा
कनेडी ः दिगवळे रांजणवाडी येथील विठ्ठल-रखुमाई मंदिरात उद्या (ता.८) आणि शुक्रवारी (ता. ९) अखंड हरिनाम सप्ताहाचे आयोजन केले आहे. वैशाख शुद्ध मोहिनी एकादशीचे औचित्य साधून हा सोहळा होणार आहे. उद्या सकाळी ८ वाजता घटस्थापना, दहा वाजता महापूजा, आरती, दुपारी महिलांचा हरिपाठ, दुपारी तीन वाजता संगीत भजन बुवा दिव्यानंद किशोर चव्हाण, तसेच साडेचार वाजता पालखी सोहळा आयोजित केला आहे. सायंकाळी साडेसात वाजता गावठणवाडीतील ग्रामस्थांचा हरिपाठ होईल. रात्री नऊ वाजता कोटेश्वर प्रासादिक भजन मंडळ, हरकुळर बुद्रुक येथील बुवा सुजित परब यांचे भजन, त्यानंतर महापुरुष प्रासादिक भजन मंडळ चंद्रकांत परब यांचे भजन होणार आहे. त्यानंतर आई महालक्ष्मी कलादिंडी भजन मंडळ, देवगड येथील उमेश प्रकाश घाडीगावकर यांचे दिंडी भजन होणार आहे. रात्री साडेदहा वाजता स्थानिक ग्रामस्थांची सुस्वर भजन आयोजित केले आहे. शुक्रवारी सकाळी पाच वाजता महाआरती, घटविसर्जन, दुपारी महाप्रसाद, रात्री महिलांचे हळदी-कुंकू होईल. त्यानंतर बक्षीस वितरण आणि रात्री अकरा वाजता भैरवनाथ दशावतार नाट्य मंडळ आयोजित महापौराणिक दशावतारी नाटक होणार आहे.
----
पदवी प्रवेशासाठी
ऑनलाइन प्रक्रिया
कणकवली ः बारावीचा निकाल जाहीर झाल्यानंतर आता पदवीप्रवेशाचे वेध लागले आहेत. यासाठी जिल्ह्यातील प्रत्येक वरिष्ठ महाविद्यालयात विशेष कक्ष सुरू केला आहे. विद्यार्थ्यांना मुंबई विद्यापीठाकडे ऑनलाइन अर्ज सादर करावा लागणार आहे. यासाठी १० जून ही अंतिम तारीख आहे. विद्यार्थ्यांना प्रवेश मागणी अर्ज, हा अर्ज ऑनलाइन भरत असताना बारावी गुणपत्र, शाळा सोडल्याचा दाखला आणि आरक्षणांमधून प्रवेश घ्यायचा असेल तर जातीचा दाखला सादर करावा लागणार आहे. प्रवेश प्रक्रियेसाठी पदवीच्या बी.ए., बी. कॉम, बीएस्सी विज्ञान तसेच बीएस्सी कॉम्प्युटर आणि बीकॉम अकाउंटन्सी अँड फायनान्स अशा विषयासाठी ही ऑनलाइन प्रवेश प्रक्रिया सुरू करण्यात आली आहे.