rat७p११.jpg -
P२५N६२२८५
चिपळूण : उन्हामुळे चिपळूण शहरातील बाजारपेठेत आता तुरळक गर्दी असते .
---
कडक उन्हामुळे चिपळूणवासीय त्रस्त
दुपारी रस्ते निर्मनुष्य ; दिनचर्या बदलली
सकाळ वृत्तसेवा
चिपळूण, ता. ७ : शहर व परिसरात गेल्या महिन्यापासून उन्हाचा कडाका वाढलेला आहे. त्यामुळे नागरिक त्रस्त झालेले आहेत. भरदुपारी शहर-परिसरातील रस्ते निर्मनुष्य झाले आहेत. वाढते ऊन, उन्हाच्या झळा व उकाड्यामुळे चिपळूण शहरातील नागरिकांची दिनचर्या बदलली आहे.
नागरिक सकाळी अकरा वाजण्यापूर्वी कामे उरकतात तर सायंकाळी सहा ते रात्री उशिरापर्यंत अनेकजण कामांना प्राधान्य देत आहेत. दुपारी बारा ते पाच या वेळेत उन्हात जाणे टाळले जात आहे. दुपारच्या लग्नसोहळ्यांवर कडक उन्हाचा परिणाम होत आहे. दुपारच्या लग्नातील जेवणावळीत वऱ्हाडींची घट झाली असून, अनेकजण औपचारिकपणे हजेरी लावून लग्नमंडपातून काढता पाय घेत आहेत. कोकणातील सर्वाधिक तापमान असलेल्या शहरांमध्ये चिपळूण शहराचा समावेश आहे. महिन्यापासून कडक ऊन पडत असल्याने शहरातील नागरिक त्रस्त झाले आहेत. दूध, भाजीपाला, फळे, किराणा आदींची खरेदी सकाळी अकराच्या आत केली जात आहे. दुपारी बारा ते पाच या वेळेत उन्हाच्या झळा मोठ्या प्रमाणावर बसतात. त्यातच ऐन दुपारी विजेचा लपंडाव सुरू आहे. रोज दुपारी खंडित होणाऱ्या वीजपुरवठ्यामुळे शहरातील नागरिक घामाघूम होत आहेत. दुरुस्तीचे काम सुरू असल्याचे त्रोटक कारण देऊन वीजपुरवठा खंडित केला जात आहे.