कृषी प्रदर्शनाचे उद्‍घाटन कृषिमंत्र्यांच्या हस्ते
कृषी अधीक्षक कार्यालय; १० ते १२ मे रोजी रत्नागिरीत आयोजन

सकाळ वृत्तसेवा
रत्नागिरी, ता. ८ ः जिल्हा नियोजन समिती, प्रकल्प संचालक, आत्मा, कृषी विभाग व पशुसंवर्धन विभाग, जिल्हा परिषद यांच्यावतीने १० ते १२ मे रोजी स्व. प्रमोद महाजन क्रीडा संकुल, आठवडा बाजार येथे जिल्हास्तरीय कृषी तंत्रज्ञान विस्तार सप्ताह व कृषी विकास परिषद, पशु-पक्षी प्रदर्शनाचे आयोजन केले आहे. या कार्यक्रमाचे उद्घाटन १० मे रोजी कृषिमंत्री अॅड. माणिकराव कोकाटे, पालकमंत्री डॉ. उदय सामंत यांच्या हस्ते होणार आहे, असे जिल्हा अधीक्षक कृषी अधिकारी शिवकुमार सदाफुले व प्रकल्प संचालक आत्मा विजय बेतीवार यांनी केले आहे.
जिल्हास्तरीय कृषी प्रदर्शनासाठी रोजगार हमी व फलोत्पादन मंत्री भरत गोगावले, कृषी राज्यमंत्री अॅड. आशिष जयस्वाल, महसूल राज्यमंत्री योगेश कदम, खासदार नारायण राणे यांच्यासह सर्व खासदार व आमदार उपस्थित राहणार आहेत. या कार्यक्रमामध्ये आंबा व शेतमाल उत्पादक ते ग्राहक थेट विक्रीचे स्वतंत्र दालन, बचतगटांचे उत्पादनांचे प्रदर्शन व विक्री, विविध जातींचे पशू-पक्षी प्रदर्शन, कृषी व कृषीसंलग्न विभागांची स्वतंत्र दालने, अत्याधुनिक कृषी यंत्रे, अवजारे यांची स्वतंत्र दालने, कृषिनिविष्ठा यांची स्वतंत्र दालने, खवय्यांसाठी रूचकर अस्सल कोकणी पदार्थांची मेजवानी अशी एकूण १६५ विविध गट, कृषी व कृषीसंलग्न विभागांची प्रशस्त दालने असणार आहेत. या दालनांमध्ये प्राधान्याने जिल्ह्यातील शेतकरी व बचतगट यांना मोफत दालने उपलब्ध करून दिली जाणार आहेत. याबरोबरच जिल्ह्यातील प्रगतशील शेतकऱ्यांचा सन्मान, कृषीविषयक विविध परिसंवाद इ. कार्यक्रमांचे आयोजन या वेळी करण्यात आले आहे तसेच पौष्टिक तृणधान्ये व पारंपरिक अशा दोन्ही प्रकारात पाककला स्पर्धाही आयोजित केल्या आहेत.