सायक्लोथॉनमध्ये ज्येष्ठ सायकलपटू
दापोलीत उद्यापासून आयोजन ; १ ते १५० किमी अंतराच्या स्पर्धा
सकाळ वृत्तसेवा
दापोली, ता. ९ः दापोली सायकलिंग क्लबतर्फे ११ व १२ मे रोजी सकाळी दापोली समर सायक्लोथॉन २०२५, सीझन ७ स्पर्धेचे आयोजन सोहनी विद्यामंदिर मैदान दापोली येथे करण्यात आले आहे. यासाठी राज्यातील अनेक नावाजलेले सायकलस्वार आपल्या कुटुंबासह दापोलीत येणार आहेत.
यामध्ये ७८ वर्षीय डॉ. निरूपमा भावे सहभागी होणार आहेत. त्यांनी ७२व्या वर्षी पुणे ते जम्मू, ७५व्या वर्षी पुणे ते कोलकाता, पंढरपूर ते घुमान पंजाब असे देशभर अनेक सायकलप्रवास केला आहे. दापोली येथील स्पर्धेत सहभागी होणाऱ्या निरूपमा यांनी कैलास, ओम पर्वत या मार्गावर सायकलिंग केले आहे त्याचबरोबर श्रीनगर ते मुंबई ते कन्याकुमारी सायकलिंग करत जागतिक विक्रम प्रस्थापित करणारे सतीश जाधव (वय ६८), अनेक लांब अंतराच्या मॅरेथॉन, राईड करणारे ७७ वर्षीय जुगल राठी, दिल्ली-कोलकाता-पुणे राईड केलेले ७९ वर्षीय गौतम भिंगानिया, जगातील सर्वात उंच उमलिंगला पास सायकल चालवत सर करणारे डॉ. सुभाष कोकणे (वय ७३), जयश्री जाधव (वय ६२), राजू औटी (वय ६१), विजय हिंगे (वय ६५), अरूण नेवसे (वय ६४), हेमलता राव (वय ६६) असे सायकलिंग क्रीडाप्रकारात वय हद्दपार करणारे काही रायडर्स दापोली सायक्लोथॉनमध्ये सहभागी होणार आहेत.
ही स्पर्धा १ ते १५० किमी अंतराची असून, ५० किमी कोस्टल सिनिक रूट, ४ ते १५० किमी शॉर्टसिटी लूप, फनराईड अशा गटात होणार आहे.