धनगर समाज समाजभवनाच्या प्रतिक्षेत
खेड, ता. ८ : तालुका धनगर समाज गेली कित्येक वर्षे अहिल्यादेवी होळकर समाजभवनाच्या प्रतिक्षेत आहे. भरणे गवळवाडी येथे असलेले समाजभवन ही खासगी मालमत्ता असून, धनगर समाज या ठिकाणी फिरकत नाही. किंबहुना धनगर समाजासाठी येथे कुलूप लागले आहे. यासाठी माजी मंत्री रामदास कदम यांनी समाजाच्या भल्यासाठी भरघोस निधी दिला होता.
काही महिन्यांपूर्वी समाजाचे उपाध्यक्ष श्याम गवळी यांनी तहसील कार्यालयासमोर अहिल्यादेवी होळकर समाजभवनासाठी उपोषण केले होते. याची दखल गृहराज्यमंत्री योगेश कदम यांनी घेऊन समाजासाठी हक्काचे पुण्यश्लोक अहिल्यादेवी भवनासाठी भरणे येथे जलसंपदा विभागाची जागा निश्चित केली आहे. हा प्रस्ताव मंत्रालय स्तरावर रखडला आहे. प्रस्ताव तत्काळ मंजूर करून समाजाला न्याय मिळावा, ही आग्रही मागणी खेड तालुका धनगर समाजामार्फत करण्यात येत आहे.