rat१०p२.jpg-
२५N६२८५६
रत्नागिरी ः गॅस भरण्यासाठी सीएनजी गॅसपंपात झालेली वाहनांची गर्दी.
-----
सीएनजीच्या तुटवड्याने रिक्षाचालक आक्रमक
रत्नागिरीत पाच किमीपर्यंत लांबलचक रांगा ; आंदोलनाचा इशारा
सकाळ वृत्तसेवा
रत्नागिरी, ता. १० : रत्नागिरी शहरात गेल्या काही दिवसांपासून सीएनजी गॅसचा मोठा तुटवडा भासत आहे. गेल्या चार ते पाच दिवसांपासून परिस्थिती अधिक गंभीर बनल्याने वाहनचालक आणि विशेषतः रिक्षाचालक पुरते हैराण झाले आहेत. ऐन उन्हाळी सुटया आणि लग्नसराईच्या काळात पर्यटकांची मोठी गर्दी शहरात असताना सीएनजीच्या कमतरतेमुळे त्यांनाही गैरसोयीचा सामना करावा लागत आहे.
शहरातील तीन सीएनजी पंपांवर पुरेसा पुरवठा नसल्याने वाहनचालकांना तासनतास रांगेत उभे राहावे लागत आहे. परिस्थिती न सुधारल्यास तीव्र आंदोलन छेडू, असा इशारा रिक्षा संघटनांनी दिला आहे. काही पंपांवर तर कमी दाबाने सीएनजी मिळत असल्याने चालकांना पुरेसा गॅस भरण्यासाठी अधिक वेळ खर्ची करावा लागत आहे. याचा थेट परिणाम रिक्षाचालकांच्या व्यवसायावर होत आहे. धंद्याच्यावेळी सीएनजी मिळत नसल्याने त्यांची आर्थिक कोंडी झाली आहे. राज्यातून रत्नागिरीत फिरण्यासाठी आलेल्या पर्यटकांनाही सीएनजीच्या प्रतीक्षेत बराच वेळ वाया घालवावा लागत आहे. यामुळे रत्नागिरीतील पर्यटनस्थळांना भेट देण्यासाठी आलेल्या पर्यटकांमध्ये नाराजी पसरली आहे.
खासदार सुनील तटकरे यांनी देखील याबाबत महानगर गॅस कंपनीच्या अधिकाऱ्यांशी चर्चा केली होती; परंतु त्यानंतरही सुधारणा होण्याऐवजी परिस्थिती अधिक बिकट बनली आहे. जिल्हाधिकारी, पुरवठा अधिकारी आणि तहसीलदारांनी या गंभीर विषयावर तातडीने लक्ष देऊन रत्नागिरी शहरातील सीएनजीचा तुटवडा दूर करावा, अशी मागणी रिक्षाचालक आणि वाहनचालकांकडून करण्यात येत आहे. सीएनजी गॅस वेळेवर न मिळाल्यास व्यवसाय होत नाही, मग बँकेचे हप्ते कसे भरायचे, या विवंचनेत रिक्षाचालक-मालक आहेत. या गंभीर परिस्थितीमुळे त्रस्त झालेल्या रिक्षाचालक-मालकांनी आता आंदोलनाचा विचार सुरू केला आहे. जर सीएनजीचा पुरवठा सुरळीत झाला नाही तर मोठे आंदोलन उभारू, असा इशारा रिक्षा संघटनांनी दिला आहे.
---
हातावरच्या पोटाचा विचार करा...
रिक्षा चालकांचे हातावरचे पोट आहे. सीएनजीसाठी अर्धादिवस रांगेत उभे राहून व्यवसाय कधी करायचा. तुटपुंज्या मिळकतीवर कुटुंबाचा चारितार्थ कसा चालवायचा याचा विचार प्रशासनाने करून त्यावर तातडीने मार्ग काढावा अशी मागणी रिक्षा चालकांतून होत आहे.