62904

जिल्ह्यातील प्रत्येक रेल्वे स्थानकावर ‘ममता कक्ष’

नीतेश राणे; कणकवली स्थानकातील कक्षाचे लोकार्पण

सकाळ वृत्तसेवा
कणकवली, ता. १० : ‘‘कोकण रेल्वेमार्गावर येणाऱ्या सिंधुदुर्ग जिल्ह्यातील प्रत्येक रेल्वे स्थानकावर ‘ममता कक्ष’ उभारण्यात येणार आहे. तशा प्रकारचे आदेश प्रशासनाला दिले आहेत,’’ अशी माहिती पालकमंत्री नीतेश राणे यांनी आज येथे दिली.
कणकवली रेल्वे स्थानकात प्रशासनाच्या माध्यमातून ‘ममता कक्ष’ उभारला आहे. या कक्षाचे लोकार्पण श्री. राणे यांच्या हस्ते करण्यात आले, त्यावेळी ते बोलत होते. यावेळी विभागीय रेल्वे व्यवस्थापक शैलेंद्र बापट, रेल्वे सुरक्षा आयुक्त गोकुळ सोनवणे, माजी नगराध्यक्ष समीर नलावडे, माजी उपनगराध्यक्ष गणेश ऊर्फ बंडू हर्णे, भाजपचे तालुकाध्यक्ष मिलिंद मेस्त्री, जिल्‍हा परिषदेचे माजी अध्यक्ष संदेश ऊर्फ गोट्या सावंत, ज्येष्ठ पत्रकार अशोक करंबेळकर, पत्रकार विजय गांवकर, डॉ. सुहास पावसकर, घनश्याम नागले, जी. पी. प्रकाश, सचिन देसाई, मधुकर मातोंडकर, रमेश मालवीय, संजय कदम, दीपक बेलवलकर, भालचंद्र मराठे, मनोहर पालयेकर, सीताराम कुडतरकर, उमेश वाळके, मेघा गांगण आदी उपस्थित होते.
--------
रेल्वे प्रशासनाने सहकार्य करावे!
श्री. राणे म्हणाले, ‘‘कोकणवासीयांसाठी रेल्वे हे प्रवासाचे मुख्य साधन आहे. त्यामुळे रेल्वेच्या प्रवासात व रेल्वे स्थानकांत चांगल्या सुविधा उपलब्ध करून देणे कोकण रेल्वे प्रशासनाची जबाबदारी आहे. नागरिकांना जलद प्रवास करता यावा, यासाठी रस्तेमार्ग व जल वाहतुकीची सुविधा उपलब्ध करून देण्याचे काम राज्य सरकार करीत आहे. रेल्वेच्या प्रवाशांना चांगल्या सुविधा उपलब्ध व्हाव्यात ही इच्छा आहे. या सुविधा उपलब्ध होण्यासाठी आम्हाला रेल्वे प्रशासनाने सहकार्य केले पाहिजे.’’