-rat१०p१६.jpg-
२५N६२९००
रत्नागिरी : कोतवडे येथे श्री महालक्ष्मी मंदिरावर कलशारोहण करताना स्वामी श्री दंडी महाराज, तर दुसऱ्या छायाचित्रात मंदिराच्या प्रांगणात झालेली भाविकांची गर्दी.
-----
महालक्ष्मी मंदिरावर कलशारोहण
जीर्णोद्धार सोहळा ; कोतवडेत भाविकांचा मेळा
सकाळ वृत्तसेवा
रत्नागिरी, ता. १० : तालुक्यातील कोतवडे गावची ग्रामदेवी श्री महालक्ष्मीच्या मंदिराचा जीर्णोद्धार सोहळा व कलशारोहण सोहळा देवीच्या उत्साहपूर्वक जयघोषात झाला. पुणे येथील परमहंस परिव्राजकाचार्य सद्गुरू श्री नृसिंह आश्रमाचे स्वामी श्री दंडी महाराज यांच्या हस्ते कलशारोहण झाले. या वेळी उपस्थित समस्त कोतवडेवासियांनी कलशाला प्रणाम करून श्री महालक्ष्मीमाता आणि स्वामी श्री दंडी महाराज यांचे आशीर्वाद घेतले.
सकाळी ७ वाजता मंदिराच्या वास्तूशांती विधीला प्रारंभ झाला. त्यानंतर देवीची आज्ञा घेऊन नूतन कलशासह समस्त ग्रामस्थांनी मंदिराला ५ प्रदक्षिणा घातल्या. त्यानंतर क्रेनद्वारे पू. स्वामी श्री दंडी महाराज यांनी मंदिराच्या शिखरावर जाऊन कलशारोहण केले. मंदिराच्या चहूबाजूला उपस्थित असलेल्या शेकडो ग्रामस्थांनी श्री महालक्ष्मीदेवीचा जयघोष केला. त्यानंतर स्वामी श्री दंडी महाराज यांच्या उपस्थितीमध्ये ग्रामस्थांनी देवीची प्रार्थना आणि आरती केली.
पब्लिक देवस्थान ट्रस्टचे अध्यक्ष अरूण पेडणेकर यांच्यासह विश्वस्त आणि ग्रामस्थ यांच्यावतीने स्वामी श्री दंडी महाराज यांचा सन्मान करण्यात आला. ग्रामस्थांना महाराजांनी आशीर्वाद दिला. सर्व विश्वस्त, मंदिराच्या कार्यात योगदान देणाऱ्या भाविकांचा स्वामी श्री दंडी महाराज यांनी स्वत:हून गौरव केला.
--------
कलश, धर्मध्वज
मंदिराच्या गाभाऱ्‍यावर आणि सभागृहावर अशा २ कलशांची स्थापना करण्यात आली. गाभाऱ्यावर स्थापन करण्यात आलेल्या कलशाचे वजन ५८ किलो तर सभागृहावरील कलशाचे वजन ३५ किलो आहे. या वेळी मंदिरावर धर्मध्वजाची स्थापना करण्यात आली. धर्मध्वजावर मारूतीसह ॐ आणि स्वस्तिक ही शुभचिन्हे कोरण्यात आली आहेत. हे दोन्ही कलश आणि धर्मध्वज ओतीव पितळेचे आहेत.