- rat१३p४६.jpg-
P२५N६३५५७
सर्वज्ञा पेठे हिला पेढा भरवताना तिचे आई-वडील.
----
सर्वज्ञा पेठेला व्हायचय ‘रोबोटिक इंजिनिअर’
१०० टक्के गुण मिळवत दापोलीत प्रथम ; आई-वडिलांसह शिक्षकांचे पाठबळ
सकाळ वृत्तसेवा
दापोली, ता. १४ ः सुरुवातीपासूनच चांगले गुण मिळवण्याची माझी इच्छा होती. त्यासाठी मेहनतही घेतली आणि त्याचे फळ मला मिळाले. मी रोज सकाळी लवकर उठून अभ्यास करत होते. मला रोबोटिक इंजिनिअर होण्याची इच्छा आहे, अशी प्रतिक्रिया शंभर टक्के गुण मिळवत दापोली तालुक्यात प्रथम क्रमांक पटकावणाऱ्या सर्वज्ञा पेठे हिने व्यक्त केली.
दापोली शिक्षणसंस्था संचालित ए. जी. हायस्कूलची सर्वज्ञा पेठे हिने नुकत्याच झालेल्या दहावी परीक्षेत १०० टक्के गुण मिळवत दापोली तालुक्यात प्रथम येण्याचा मान पटकावला तसेच मिहीर कोपरकरने ९९ टक्के गुण मिळवून द्वितीय तर शर्वरी नांदीसकर ९८.२० टक्के गुण मिळवून तृतीय क्रमांक प्राप्त केला आहे. दहावी परीक्षेत हायस्कूलमधून २६८ विद्यार्थी परीक्षेला बसले होते. त्यापैकी २६३ विद्यार्थी उत्तीर्ण झाले. हायस्कूलचा निकाल ९८.१३ टक्के लागला आहे. त्यामध्ये ९० टक्केपेक्षा अधिक गुण मिळवणारे १८ विद्यार्थी तर ८० ते ९० टक्केदरम्यान असलेले २८ विद्यार्थी आहेत. सर्व यशस्वी विद्यार्थी व शिक्षकांचे संस्थेचे अध्यक्ष डॉ. प्रसाद करमरकर, सचिव डॉ. विनोद जोशी, शालेय समिती अध्यक्ष रवींद्र कालेकर, शालेय समितीचे सदस्य श्रीकांत निजामपूरकर, स्मिता सुर्वे, सर्व संचालक, मुख्याध्यापक एस. एम. कांबळे, उपमुख्याध्यापक खटावकर डी. एम., पर्यवेक्षक अर्जुन घुले, अनिल पेठकर यांनी विशेष कौतुक केले आहे.
दरम्यान, दहावी परीक्षेत मिळालेल्या यशाविषयी ‘सकाळ’शी बोलताना सर्वज्ञा म्हणाली, मी रोज सकाळी लवकर उठून अभ्यास करत होते. माझी सुरुवातीपासूनच चांगले गुण मिळवण्याची इच्छा होती. तसेच माझ्या घरातील सर्वजण उच्चशिक्षित आहेत. त्यामुळे मला प्रेरणा मिळत होती. माझ्या यशाचे श्रेय मी माझे आई-वडील, शाळेचे सर्व शिक्षक व माझ्या खासगी क्लासेसचे मार्गदर्शक यांना आहे. तसेच मला विज्ञान शाखेत रोबोटिक इंजिनिअर या क्षेत्रात आवड आहे. त्यामध्येच करिअर करायचे आहे, असेही सर्वज्ञाने सांगितले.