वैद्यकीय महाविद्यालयात बेशिस्त कारभार
प्रसाद गावडेंचा आरोपः कर्मचाऱ्यांकडून वेळेचे पालन नाही
सकाळ वृत्तसेवा
सिंधुदुर्गनगरी, ता. १४ः शासकीय वैद्यकीय महाविद्यालय व रुग्णालय, सिंधुदुर्ग आस्थापनेकडील कायम कर्मचारी कार्यालयीन वेळेचे पालन करीत नसून, बेशिस्त कारभार सुरू आहे. रोज उशिराने येणाऱ्या कर्मचाऱ्यांवर कारवाई करा, अशी मागणी शिवसेना कामगार सेना अध्यक्ष प्रसाद गावडे यांनी अधिष्ठातांकडे निवेदनाद्वारे केली आहे.
शासकीय वैद्यकीय महाविद्यालय व रुग्णालय, सिंधुदुर्ग आस्थापनेवर कार्यरत कायम कर्मचारी कार्यालयीन वेळ व शिस्तीचे पालन करत असल्याचे दिसत नाही. काही कर्मचारी रोज सकाळी पावणे अकरा नंतरच कार्यालयात हजेरी लावतात. हेच कर्मचारी दुपारी दोन वाजता जेवणासाठी मुख्यालय सोडतात, ते साडेतीन वाजल्याशिवाय परत मुख्यालयी येत नाहीत. मेडिकल कॉलेज व रुग्णालय कार्यालयाचा प्रशासकीय कारभार म्हणजे आज ‘आओ जाओ घर तुम्हारा’ असाच काहीसा असून त्याची गंभीर दखल अधिष्ठातांनी घेण्याची मागणी गावडे यांनी निवेदनाद्वारे केली आहे.
निवेदनात म्हटले आहे की, वैद्यकीय महाविद्यालय सुरू झाल्यापासून सुरुवातीचे काही दिवस वगळले तर तत्कालीन अधिष्ठातांवर याआधी त्या त्या वेळी अनेक आरोप देखील झाले; मात्र कर्मचाऱ्यांचा असा बेजबादारपणा आजपर्यंत कधी दिसून आलेला नाही. कार्यालयातील सीसीटीव्ही फुटेज तपासल्यास कार्यालयीन कामकाजाची काय भयंकर परिस्थिती चालली आहे, याचे पुरावे मिळतील. खेदाची बाब अशी की हेच ‘लेट लतीफ’ बनून येणारे कायम कर्मचारी कंत्राटी कर्मचाऱ्यांना मात्र कार्यालयीन शिस्त, कामकाजातील जबाबदारपणा, कामाबाबतची आस्था व नागरी सेवा शर्तीचे धडे देत असतात.
सामान्य प्रशासन विभागाच्या २४ फेब्रुवारी २०२० च्या शासन निर्णयानुसार कार्यालयीन कामकाजाची वेळ सकाळी ९.४५ ते सायंकाळी ६.१५ अशी असून कार्यालयीन कर्मचारी महिन्यात तीनपेक्षा अधिक वेळा कामावर उशिरा हजेरी लावत असल्यास त्याची नैमित्तिक रजा वजा करण्यात यावी, अशी तरतूद आहे. त्यानुसार कार्यालयीन वेळेनंतर हजेरी लावणाऱ्या कर्मचाऱ्यांची दखल घेऊन संबंधितांना आवश्यक ती सूचना देण्यात यावी व कार्यालयात काम करणाऱ्या सर्वच कर्मचाऱ्यांना ‘कामाची पदसूची’ तपशील देऊन कामकाजात सुसूत्रता आणावी, अशा मागणीचे पत्र गावडे यांनी दिले आहे. त्यावर अधिष्ठाता कोणती कार्यवाही करतात, हे पाहणे औत्सुक्याचे बनले आहे.

कोट
शासकीय वैद्यकीय महाविद्यालयातील नियमित कर्मचारी कार्यालयीन वेळेत कामावर येत नसल्याची तक्रार प्राप्त झाली आहे. त्याची शहानिशा करून कर्मचारी वेळेवर येत नाहीत अथवा शिस्तीचे पालन करीत नसल्याचे दिसून आल्यास संबंधितांवर कारवाई केली जाईल.
- अनंत डवंगे, अधिष्ठाता, शासकीय वैद्यकीय महाविद्यालय