महामार्ग पोलिस वाहतूक केंद्रात
अखेर माहिती अधिकारी नियुक्त
विशेष पोलिस महानिरीक्षक : बरेगारांच्या मागणीची दखल
सकाळ वृत्तसेवा
सावंतवाडी, ता. १४ः महामार्ग पोलिस वाहतूक केंद्र कणकवली-कसाल येथे अखेर माहिती अधिकार अधिकाऱ्याची नियुक्ती केली आहे. या कार्यालयात माहिती अधिकार कायद्यांतर्गत माहिती देण्यासाठी अधिकारी नसल्याबाबत तक्रार सामाजिक कार्यकर्ते जयंत बरेगार यांनी दाखल केल्यानंतर ही कार्यवाही करण्यात आली.
याबाबत अधिक माहिती अशी की, महामार्ग पोलिस आस्थापनेत प्रतिनियुक्तीवर असलेले काही कर्मचारी व अधिकारी नियमबाह्य पद्धतीने आणि मुदत संपूनही कार्यरत असल्याची बाब समोर आली होती. याबाबत सामाजिक कार्यकर्ते बरेगार यांनी २० मार्च २०२४ ला कणकवली-कसाल येथील महामार्ग पोलिस वाहतूक केंद्राला भेट देऊन माहिती अधिकारांतर्गत माहिती मागितली होती. त्यावेळी त्यांना या कार्यालयात माहिती अधिकार अधिकारी नियुक्त नसल्याचे सांगण्यात आले. तसेच, प्रभारी अधिकारी उपलब्ध नसल्याचे आणि सहाय्यक प्रभारी अधिकारी रत्नागिरी येथे कार्यरत असल्याने तेथे जाऊन माहिती घ्यावी, असे त्यांना कळविण्यात आले.
या गंभीर बाबीची दखल घेत श्री. बरेगार यांनी राज्य माहिती आयुक्त, कोकण खंडपीठ, नवी मुंबई यांच्याकडे माहिती अधिकार अधिनियमान्वये अपील दाखल केले. या अपिलाची प्रत त्यांनी अप्पर पोलिस महासंचालक (वाहतूक), महाराष्ट्र राज्य मुंबई यांच्याकडेही पाठविली होती. या तक्रारीची दखल घेत रायगड परिक्षेत्राचे विशेष पोलिस महानिरीक्षक यांच्या कार्यालयाने १६ एप्रिलला काढलेल्या आदेशानुसार माहिती अधिकाऱ्याची नियुक्ती करण्यात आली. या नियुक्तीमुळे आता कणकवली-कसाल येथील महामार्ग पोलिस वाहतूक केंद्राशी संबंधित माहिती नागरिकांना वेळेत मिळणार आहे.