नवोदितांच्या प्रथम प्रकाशनासाठी पुरस्कार
मराठा मंदिर ; संस्थेस ७९ वर्षे पूर्ण, पारितोषिक वितरणादिवशी निकाल
सकाळ वृत्तसेवा
रत्नागिरी, ता. १५ ः मराठा मंदिरच्या साहित्य शाखेतर्फे नवोदित साहित्यिकांच्या कलाकृतीला प्रोत्साहित करण्यासाठी, लेखकांच्या साहित्याला नवी उमेद जागवण्यासाठी प्रथम प्रकाशनासाठी साहित्य पुरस्कार २०२४ जाहीर करण्यात आले असून, नवोदित लेखकांनी पहिले प्रकाशित पुस्तक १ जानेवारी ते ३१ डिसेंबर २०२४ या कालावधीतील असावे, असे मराठा मंदिर साहित्यिक शाखेचे अध्यक्ष डॉ. नितीन विचारे यांनी सांगितले.
मराठा मंदिर संस्था गेल्या सात दशकांपासून महाराष्ट्रभर शैक्षणिक, वैद्यकीय, सामाजिक तसेच कला आणि साहित्य क्षेत्रातील कार्यरत अशी अग्रणी संस्था आहे. या संस्थेला ७९ वर्षे पूर्ण झाली आहेत. मराठा मंदिरच्या साहित्य शाखेतर्फे नवोदित साहित्यिकांच्या कलाकृतींना प्रोत्साहित करण्याच्या उद्देशाने नवोदित साहित्यिकांच्या प्रथम प्रकाशनासाठी पुरस्कार व सन्मानचिन्ह देण्यात येते. पुरस्काराचे हे यंदाचे आठवे वर्षे आहे. लेखकांनी पहिले प्रकाशित पुस्तक १ जानेवारी २०२४ ते ३१ डिसेंबर २०२४ या कालावधीसाठी पाठवावीत. पुस्तक वाङ्मयीन प्रकारातील असावे, जसे कांदबरी, कथासंग्रह, काव्यसंग्रह, समीक्षणात्मक ग्रंथ, बालवाङ्मय, संशोधनात्मक ग्रंथ, चरित्र (आत्मचरित्र, व्यक्तीचित्रण), प्रवासवर्णन, ललित वाङ्मय, मराठी साहित्यातील अन्य कोणताही प्रकार, साहित्यांचे प्रकाशित होणारे प्रथम लिहिलेले प्रथामावृत्ती असलेले पुस्तक असावे.
पुस्काचे लिखाण लेखकाचे स्वतःचे व स्वतंत्र असावे, अनुवादित वा आधारित नसावे. मान्यवर साहित्यिकाकडून या पुस्तकाचे परीक्षण केले जाईल. पुरस्काराविषयी सर्व निर्णय तज्ञ समिती नेमून घेतले जातात. प्रथम प्रकाशित पुस्तके ३० जून २०२५ पूर्वी संस्थेच्या मराठा मंदिर साहित्य शाखा ३रा मजला, मराठा मंदिर इमारत, मराठा मंदिर मार्ग, बाबासाहेब गावडे चौक मुंबई ४००००८ या कार्यालयात पुस्तकांच्या २ प्रती व त्याबरोबर संस्थेने विहित केलेल्या अर्जामध्ये माहिती भरून पाठवावी. अर्ज कार्यालयात उपलब्ध आहे. या पुरस्काराचा पारितोषिक वितरण सोहळ्याची तारीख यथावकास कळवण्यात येईल. पारितोषिक वितरणादिवशीच निकाल जाहीर करण्यात येईल. अधिक माहितीसाठी डॉ. नितीन विचारे अध्यक्ष मराठा मंदिर साहित्य शाखा यांच्याशी संपर्क साधावा.
--