कणकवली येथे
विजेचा लपंडाव
कणकवली ः शहरात गेले काही दिवस विजेचा लंपडाव सुरू आहे. दिवसभरात वारंवार वीज खंडित होते. त्यामुळे व्यावसायिक अडचणीत आले आहेत. सध्या मुंबईचे चाकरमानी गावाकडे आले आहेत. त्यामुळे बाजारातील हॅाटेल व्यावसाय तेजीत आहे. मात्र, वीज पुरवठा खंडित होत असल्याने अडचणी येत आहेत. काही भागांत कमी दाबाने वीजपुरवठा होत आहे. तापमान वाढल्याने अंगाची लाहीलाही होत आहे. त्यातच विजेची उपकरणे बंद असल्याने तालुकावासीय मेटाकुटीला आले आहेत. उन्हाळ्यातच ही समस्या, तर पावसाळ्यात कसे, असा प्रश्‍न स्थानिकांना पडला आहे.
----------
कनेडी परिसरात
पावसाची रिपरिप
कनेडी ः येथील पंचक्रोशीत आज पुन्हा पावसाने रिपरिप सुरू केली. गेले तीन दिवस परिसरात दुपारनंतर पाऊस हजेरी लावत आहे. पावसामुळे हवेत गारवा आला आहे. मात्र, सध्या सुरू असलेल्या धार्मिक आणि सांस्कृतिक कार्यक्रमांवर परिणाम होत आहे. शेतकऱ्यांच्या मशागतीची कामे रखडली आहेत. तसेच पावसाळ्यासाठी गुरांसाठी ठेवलेले गवत अवकाळी पावसात भिजत असल्याने शेतकरी चिंतातुर आहे.