डुकरांच्या धडकेत दुचाकीस्वार जखमी
चिपळूण, ता. १५ ः तालुक्यातील खडपोली तळेवाडी येथील तरुण अनंत घाणेकर याला रात्री कामावर येत असताना डुकरांनी धडक दिल्याने तो गंभीर जखमी झाला असून, त्याला अधिक उपचारासाठी पुणे येथे हलविले आहे. हा अपघात १३ मे रोजी रात्री घडला. खडपोली तळेवाडी येथील अनंत घाणेकर नेहमीप्रमाणे रात्री जे. के. फाईल कंपनीत दुचाकीने कामाला जात असताना वाटेत दुचाकीला डुकरांची धडक बसली. या वेळी घाणेकर खाली कोसळल्याने त्याला खूप मार लागला. तो गंभीर जखमी झाल्याने प्रथम त्याला सह्याद्री हॉस्पिटल कऱ्हाड येथे हलविले होते; परंतु त्याला अधिक उपचाराची गरज असल्याने पुणे येथे हलविण्यात आले आहे. या घटनेने कामगार वर्गात चिंतेचे वातावरण पसरले आहे.