64996

बुद्ध, डॉ. आंबेडकरांचा विचार तळागाळात पोहोचवा

भीमराव आंबेडकर ः जानवली येथे बुद्ध विहाराचे लोकार्पण

कणकवली, ता.२० : डॉ.बाबासाहेब आंबेडकर यांनी राज्‍यात १९३८-१९४० या कालखंडात महार परिषदा घेऊन समाजाला जागृत करण्याचे काम केले. यातील एक परिषद जानवली गावात झाली होती. याच गावात भारतीय बौद्ध महासभेच्या मुंबई आणि जानवली शाखेने नव्याने लुंबिनीवन बुद्ध विहार बांधले आहे. या बुद्ध विहाराच्या माध्यमातून तथागत गौतम बुद्ध आणि डॉ. बाबासाहेब आंबेडकर यांचे विचार तळागाळापर्यंत पोहोचवण्याचे काम त्यांच्या अनुयायांनी करावे, असे आवाहन भारतीय बौद्ध महासभेचे राष्ट्रीय कार्याध्यक्ष, समता सैनिक दलाचे कमांडर इन चीफ तथा डॉ. बाबासाहेब आंबेडकर यांचे नातू डॉ. भीमराव आंबेडकर यांनी केले.
जानवली येथील लुंबिनीवन बुद्ध विहारचे लोकार्पण डॉ. भीमराव आंबेडकर यांनी केले. या कार्यक्रमावेळी जानवली बौद्ध विकास संघाचे अध्यक्ष सुनील पवार, स्वागताध्यक्ष तथा जानवलीचे सरपंच अजित पवार, भंते धम्मानंद, कश्यप, भारतीय बौद्ध महासभेचे जिल्हाध्यक्ष आनंद कासार्डेकर, उपसरपंच किशोर राणे, भारतीय बौद्ध महासभेचे महिला जिल्हाध्यक्षा प्रा. सुषमा हरकुळकर, तालुकाध्यक्ष भाई जाधव, पोलिसपाटील मोहन सावंत, माजी पोलिसपाटील पांडुरंग राणे, महिला तालुकाध्यक्षा आशाताई संजय भोसले, डॉ. सतीश पवार, अ‍ॅड. मोहन राव, जिल्हा माजी अध्यक्ष विश्वनाथ कदम, महासभेच्या प्रचार व पर्यटन विभाग सचिव दीपक कांबळे, संरक्षण विभागचे दिलीप तंरदळेकर, जिल्हा सरचिटणीस संजय पेंडुरकर, तालुका शाखेचे सचिव सुभाष जाधव, वंचित बहुजन आघाडीचे जिल्हाध्यक्ष महेश परुळेकर, पाडुरंग राणे, भारतीय बौद्ध महासभेचे रत्नागिरीचे जिल्हाध्यक्ष अनंत सावंत, धनाजी जाधव, प्रभाकर जाधव, भिकाजी जाधव, मोहन जाधव, सूर्यकांत कदम, आदी मान्यवर उपस्थित होते.
डॉ. भीमराव आंबेडकर म्हणाले, जानवली गावाला मोठा इतिहास आहे. डॉ. बाबासाहेब आंबेडकर यांच्या पदस्पर्शाने ही भूमी पावन झाली आहे. १४ मे १९३८ मध्ये डॉ. बाबासाहेबांनी जानवली येथे महार परिषद घेतली. या परिषदेमुळे दलित समाजबांधव जागृत होऊन कोकणात सामाजिक परिवर्तन घडले.
कार्यक्रमाच्या आरंभी बौद्ध समाजातील युवती आणि महिलांनी स्वागत गीत म्हटले. मान्यवरांचा परिचय प्रा. राहुल पावार यांनी करून दिला. नीलेश पवार यांनी सूत्रसंचालन केले.