rat23p4.jpg
65742
रत्नागिरीः उच्च व तंत्र शिक्षण विभाग आयोजित विभागस्तरीय कार्यशाळेत मार्गदर्शन करताना प्रकाश देशपांडे.

....तर घराघरात ग्रंथ घेऊन जावे लागेल !
प्रकाश देशपांडे; विविध योजना लोकांपर्यंत पोचवण्याचे आवाहन
सकाळ वृत्तसेवा
रत्नागिरी, ता. २३ः वाचन कमी होत चाललंय. वाचकांची संख्याही कमी होत आहे. माणसं एकमेकांशी बोलायचे कमी झालेत. केवळ मोबाईलवरील संदेशाद्वारे बोलत आहेत. ही परिस्थिती बदलायची असेल तर घराघरात ग्रंथ घेऊन जावे लागेल. त्यांना मोफत वाचायला द्यावे लागतील. त्यामधून वाचनाची सवय वाढवावी लागेल, असे आवाहन ज्येष्ठ साहित्यिक प्रकाश देशपांडे यांनी केले.
उच्च व तंत्रशिक्षण विभाग, ग्रंथालय संचालनालयद्वारा आयोजित विभागस्तरीय राजा राममोहन रॉय ग्रंथालय प्रतिष्ठान यांच्या अर्थसहाय्याच्या विविध योजनेविषयी विभागस्तरीय कार्यशाळेच्या उद्घाटनप्रसंगी ते बोलत होते. या कार्यशाळेचे उद्घाटन समिती सदस्य किरण धांडोरे यांच्या हस्ते झाले. या प्रसंगी उपजिल्हा निवडणूक अधिकारी राहुल गायकवाड, जिल्हा महिला व बालविकास अधिकारी श्रीकांत हावळे, कोकण विभाग ग्रंथालय संघाचे अध्यक्ष दिलीप कोरे, रत्नागिरी जिल्हा ग्रंथालय संघ अध्यक्ष श्रीकृष्ण साबणे, ठाणे जिल्हा ग्रंथालय अधिकारी प्रशांत पाटील, सहाय्यक ग्रंथालय संचालक सुनील हुसे आदी उपस्थित होते.
या प्रसंगी देशपांडे म्हणाले, समाजाचे काहीतरी देणे लागतो, या भावनेतून दरवर्षी विभागस्तरीय कार्यशाळेला सर्व ग्रंथपाल उपस्थित असतात. राजा राममोहन रॉय ग्रंथालय प्रतिष्ठान यांच्या अर्थसहाय्याने राबवण्यात येत असलेल्या विविध योजना लाभार्थ्यांपर्यंत पोहचवा.
रत्नागिरीत झालेल्या दोनदिवसीय कार्यशाळेतील विविध सत्रांचा लाभ घेताना आर्थिक बाबींच्या योजनांचा लाभही घ्यावा, असे धांडोरे म्हणाले. या वेळी वाचन माणसाला समृद्ध बनवते. पुस्तक वाचनामुळे मी घडलो, आजही पुस्तके वाचतो, असे गायकवाड यांनी सांगितले. साबणे, पाटील यांनीही या वेळी मनोगत व्यक्त केले. सुरवातीला राजा राममोहन रॉय आणि डॉ. एस. आर. रंगनाथन् यांच्या प्रतिमांचे पूजन आणि दीपप्रज्ज्वलन करण्यात आले. जिल्हा ग्रंथालय अधिकारी दीपक झोडगे यांनी स्वागत केले तर हेमंत काळोखे यांनी आभार प्रदर्शन केले.