भंडारी हायस्कूलचा मूल्यांकन प्रस्ताव धूळ खात

शिक्षणाधिकारी कार्यालयाकडून दुर्लक्ष; अध्यक्ष पाटकरांचे मुख्यमंत्र्यांना पत्र

सकाळ वृत्तसेवा
मालवण, ता. २३ ः येथील भंडारी एज्युकेशन सोसायटी संचलित भंडारी हायस्कूल व कनिष्ठ महाविद्यालयाच्या विज्ञान शाखेला अनुदान मिळावे यासाठी भंडारी एज्युकेशन सोसायटीकडून शिक्षण विभागाकडे प्रस्ताव दाखल केल्यानंतर यासाठी आवश्यक असलेल्या मूल्यांकनासाठी देखील दाखल केलेला प्रस्ताव वरिष्ठ स्तरावरून सिंधुदुर्गच्या माध्यमिक शिक्षणाधिकाऱ्याकडे आला आहे. मात्र, गेले वर्षभर मूल्यांकन प्रस्ताव शिक्षणधिकारी कार्यालयात धूळ खात पडून आहे. आता संस्थेने मुख्यमंत्र्यांकडे न्यायाची मागणी केली आहे.
संस्थेच्या पदाधिकाऱ्यांनी माध्यमिक शिक्षणाधिकारी यांच्याकडे तसेच शिक्षण विभागातील वरिष्ठ अधिकाऱ्यांकडे वेळोवेळी पाठपुरावा करूनही मूल्यांकन प्रस्तावाबाबत कोणतीही कार्यवाही झाली नसल्याने भंडारी एज्युकेशन सोसायटी (मालवण) मुंबई या संस्थेचे अध्यक्ष विजय पाटकर यांनी थेट मुख्यमंत्र्यांचे दरवाजे ठोठावत न्याय मिळवून द्यावा, अशा मागणीचे पत्र पाठविले आहे.
निवेदनात श्री. पाटकर यांनी म्हटले आहे की, जिल्हातील सर्वांत जुनी अशी शिक्षणसंस्था असलेल्या येथील भंडारी एज्युकेशन सोसायटीला या संस्थेला १२८ वर्षे झाली आहेत. या संस्थेमार्फत शहरात हायस्कूल व ज्युनिअर कॉलेज चालविले जाते तसेच वडाचापाट या गावी श्री देवी शांतादुर्गा हायस्कूलही चालविले जाते. १९६४ पासून भंडारी ए. सो. ज्युनिअर कॉलेजमध्ये आर्टस, कॉमर्स शाखा सुरु असून १० वर्षापूर्वी सायन्स विभागही सुरू करण्यात आला आहे. मात्र, तोअनुदानित नसल्याने मुलांना शुल्क भरावे लागत आहे.
भंडारी एज्यूकेशन सोसायटी ज्युनियर कॉलेजचा हा सायन्स विभाग अनुदानावर यावा. यासाठी संस्थेने प्रयत्न करत २०२४ मध्ये शासनाकडे प्रस्ताव दाखल केला. तसेच यासाठी आवश्यक असलेल्या शालेय मूल्यांकनासाठी देखील प्रस्ताव दाखल केला. मूल्यांकनासाठी केलेला प्रस्ताव शिक्षण उपसंचालकांकडून ८ जून २०२४ ला माध्यमिकच्या शिक्षणाधिकाऱ्यांकडे पाठवून मूल्यांकन प्रस्तावासाठी शालेय तपासणी करून अहवाल सादर करण्याच्या सूचना केल्या. मात्र, आता वर्ष झाले तरी मूल्यांकन प्रस्ताव शिक्षणाधिकारी कार्यालयातच असून अनेकवेळा संस्थेचे मुख्य कार्यकारी अधिकारी वामन खोत यांनी या संदर्भात माध्यमिक शिक्षणाधिकाऱ्यांची भेट घेऊन विनंती केली. मात्र, दुर्दैवाने कोणताही परिणाम झाला नाही. तसेच या संदर्भात शिक्षण संचालक, शिक्षण आयुक्त, शिक्षण सचिव, शिक्षण उपसंचालक कोल्हापूर या सर्वांशी पत्रव्यवहार केला. मात्र, मूल्यांकन प्रस्तावाची फाईल सिंधुदुर्ग, माध्यमिक शिक्षणाधिकारी विभागातून बाहेर येत नाही. तरी याबाबत आपण लक्ष घालावे व या शिक्षण संस्थेला न्याय मिळवून द्यावा, अशी मागणी श्री. पाटकर यांनी मुख्यमंत्र्यांना पाठविलेल्या पत्रात केली आहे.