rat23p7.jpg-
65774
रत्नागिरी : ग्रामदैवत श्री देव भैरी मंदिराच्या प्रांगणातील दक्षिणाभिमुखी श्री हनुमान मंदिराच्या जीर्णोद्धारप्रसंगी कलशाचे पूजन करताना करवीरपीठाचे श्री विद्यानृसिंह भारती.
-------
रत्नागिरीत दक्षिणामुखी हनुमान मंदिराचा जीर्णोद्धार
श्री विद्यानृसिंह भारती यांच्या हस्ते कलशारोहण; विविध धार्मिक कार्यक्रम
रत्नागिरी, ता. २३ : रत्नागिरीचे ग्रामदैवत श्रीदेव भैरी मंदिराच्या प्रांगणात असलेल्या दक्षिणामुखी श्री हनुमान मंदिराचा जीर्णोद्धार करण्यात आला. श्रीमती सत्यभामा कृष्णकांत बोरकर यांनी आपला मुलगा (कै.) लिलाधर कृष्णकांत बोरकर यांच्या स्मरणार्थ दिलेल्या देणगीतून हा जीर्णोद्धार करण्यात आला. करवीरपीठाचे शंकराचार्य श्री विद्यानृसिंह भारती यांच्या हस्ते कलशारोहण भक्तीपूर्ण वातावरणात झाले. या वेळी भाविकांनी हनुमंताचा जयघोष केला.
श्रीदेव भैरी, जोगेश्वरी, नवलाई पावणाई, तृणबिंदूकेश्वर ट्रस्टतर्फे कलशारोहणानिमित्त तीन दिवस विविध कार्यक्रमांचे आयोजन केले. या सोहळ्याला ट्रस्टचे अध्यक्ष मुन्नाशेठ सुर्वे, बारा वाड्यातील गावकरी, मानकरी, उत्सव समिती सदस्य, ग्रामस्थ बहुसंख्येने उपस्थित होते. मंदिराचे सुबक बांधकाम मंदिर विश्वायन कन्स्ट्रक्शन (पावस) विनायक भाटकर यांनी उत्कृष्ट केले आहे.
कलशारोहण सोहळ्यात धार्मिक, सांस्कृतिक कार्यक्रमांचे आयोजन केले होते. बुधवारी श्रीराम मंदिर ते भैरी मंदिर अशी कलश मिरवणूक काढण्यात आली. काल पुण्याहवाचन, देवतास्थापना, वास्तूसंप्रोक्षण, देवसंप्रोक्षण, कलश स्नानविधी करण्यात आले. आज सकाळी ८ वाजल्यापासून कलशारोहण सोहळ्याला प्रारंभ झाला. देवतापूजन, होमहवन, सत्य मारूती पूजा, पूर्णाहुती, बलिदान अशा धार्मिक विधीनंतर कलशारोहण सोहळा झाला.

चौकट
भजनांनी वाढवली रंगत
श्री कालभैरव प्रासादिक भजन मंडळ (मुरूगवाडा, बुवा दीपक पिलणकर), श्री स्वामी समर्थ प्रासादिक भजन मंडळ (केळ्ये, बुवा उदय मेस्त्री आणि दीनानाथ बारगुडे), श्री हनुमान प्रासादिक भजन मंडळ (कोतवडे, बुवा विजय मयेकर), श्री राम प्रासादिक भजन मंडळ (शिरसे, बुवा संतोष शिरसेकर) यांची भजने उत्साहात झाली. या भजनांनी वातावरण भक्तीमय झाले तसेच श्री अनिरूद्ध बापू शहर उपासना केंद्रातर्फे हनुमान चालिसा पठण करण्यात आले.