rat23p9.jpg -
65776
चिपळूण : शहरातील मटण व मच्छीमार्केटसह भाजीमंडईची झालेली बिकट अवस्था.
--------------

स्ट्रक्चरल ऑडिटच्या अहवालानंतर लिलाव प्रक्रिया
मुख्याधिकारी विशाल भोसले ; मटणमार्केट, भाजीमंडईची अवस्था बिकट
चिपळूण, ता. २३ : शहरातील मच्छी-मटणमार्केटसह भाजीमंडई इमारतीच्या स्ट्रक्चरल ऑडिटचा अहवाल दोन दिवसात येणार आहे. नगरपालिकेने या दोन्ही इमारतींची तपासणी सांगली येथील वालचंद शासकीय महाविद्यालयाकडून करून घेतली आहे. अहवालानंतर दोन्ही प्रकल्पांच्या लिलावाची प्रक्रिया होणार असल्याची माहिती मुख्याधिकारी विशाल भोसले यांनी दिली.
२० वर्षांपूर्वी मच्छी-मटण व भाजीमंडईच्या पूर्वीच्या इमारती पाडून त्या जागी नव्या इमारती बांधण्यासाठी भूमीपूजन करण्यात आले; मात्र त्यानंतर त्यात राजकारण शिरल्याने हे दोन्ही प्रकल्प आजतागायत सर्व सोयीसुविधांनीयुक्त पूर्ण होऊ शकलेले नाहीत. तरीही त्यामधील गाळ्यांचा अनेकदा लिलाव करण्याचा प्रयत्न नगरपालिकेने केला; मात्र भाड्याने देण्याची वर्षे मोठी, ना परतावा अनामत व भाड्याची आवाक्याबाहेरील रक्कम यामुळे सुविधा नसलेले गाळे घेण्यापेक्षा बाजारात नवे गाळे घेऊन व्यवसाय केलेला बरा, अशी भूमिका व्यावसायिकांनी घेतल्याने हे दोन्ही प्रकल्प इतकी वर्षे पडून आहेत.
मुख्याधिकारी भोसले यांनी पालिकेचे होणारे आर्थिक नुकसान लक्षात घेता या प्रकल्पांचा लिलाव करण्याचे काम हाती घेतले; मात्र या दोन्ही प्रकल्पांमध्ये सुविधा नसल्याने त्याचे फेरमूल्यांकन करावे, अशी मागणी ज्येष्ठ भाजी व्यावसायिक सुधीर शिंदे व अन्य काही व्यावसायिकांनी केली होती. त्यामुळे ती मागणी विचारात घेऊन मुख्याधिकारी भोसले यांनी महिनाभरापूर्वी जिल्हाधिकारी एम. देवेंदर सिंह यांच्या अध्यक्षतेखालील त्रिसदस्यीय समितीकडून भाजीमंडईतील ६२ गाळे, २१ ओटे, मच्छी-मटणमार्केटमधील ४३ गाळे, पवनतलाव मैदान परिसरातील इमारतीतील ७ गाळे व गोवळकोट धक्का येथील कॅन्टिन ३० वर्षांसाठी भाडेतत्त्वावर देण्यास मंजुरी मिळवून आणली आहे. तसेच नापरतावा अनामत रक्कम, भाडे हेही ठरले आहे. त्याच्या मागील रक्कमा पाहता त्यात आता मोठी घसरण झाली असल्याने लिलावात सहभागी होण्याची तयारी व्यावसायिकांनी दाखवल्याचे दिसून येत आहे.
--------------
कोट
सांगली महाविद्यालयाकडून मटणमार्केटसह भाजीमंडई इमारतीचे स्ट्रक्चरल ऑडिट करून घेण्यात आले आहे. आधीच स्पष्ट केल्यानुसार, सोयीसुविधा व दुरुस्ती लिलाव प्रक्रिया पूर्ण झाल्यावर केली जाईल. त्यामुळे येत्या दोन दिवसात स्ट्रक्चरल ऑडिटचा अहवाल येणार आहे. या अहवालात ज्या सूचना दिल्या जातील त्यानुसार कार्यवाही करून लगेचच लिलाव प्रक्रिया केली जाणार आहे.
-विशाल भोसले, मुख्याधिकारी, चिपळूण पालिका