बंद पथदीपांमुळे खेंड परिसरात चोऱ्या
शिवसेनेचे मुख्याधिकाऱ्यांना निवेदन ; कार्यवाहीकडे लक्ष
सकाळ वृत्तसेवा
चिपळूण, ता. २७ ः शहरातील खेंड परिसरामध्ये गेले दोन-तीन दिवस पथदीप बंद आहेत. वारंवार सूचना देऊनही त्याकडे प्रशासन दुर्लक्ष करत आहे. या भागात काही सदनिका फोडून चोरट्यांनी चोरी केल्याचे प्रकारही घडले आहेत. भविष्यात अशा घटना घडण्याची शक्यता नाकारता येत नाही. त्यामुळे तातडीने या परिसरातील पथदीप सुरू करावेत, अशी मागणी शिवसेनेचे उपशहरप्रमुख अंकुश आवले यांनी मुख्याधिकारी विशाल भोसले यांच्याकडे निवेदनाद्वारे केली.
काही दिवसांपूर्वी खेंड भागामध्ये चोरट्यांनी धुमाकूळ घातला होता. या परिसरातील काही सदनिका रात्रीच्यावेळी फोडल्या. दागिने आणि रोख रक्कम घेऊन ते चोरटे पसार झाले. या घटनांमुळे त्या परिसरातील नागरिकांमध्ये भीतीचे वातावरण निर्माण झाले आहे. पथदीप बंद असल्यामुळे चोरटे रात्री काळोखाचा फायदा घेऊन संधी साधत आहेत. त्याचबरोबर रात्रपाळीला जाणारे किंवा रात्रपाळीवरून येणाऱ्या नागरिकांच्याही जिवाला धोका निर्माण झालेला आहे. रात्री चोरांकडून हल्ला झाल्यास नाहक बळी जाऊ शकतो, अशी भितीही नागरिकांच्या मनात आहे. या विषयाची गांभीर्याने दखल घेऊन खेंड परिसरासह शहरात त्या त्या भागातील बंद असलेले पथदीप सुरू करावेत तसेच आवश्यक त्या मोक्याच्या ठिकाणी हायमास्ट उभारावे, अशी मागणी आवले यांनी केली आहे.