66557

दशावतार कला गोमंतक भूमीत रुजावी

झिलू गोसावी ः गोव्यात शांतादुर्गा वर्धापन दिनानिमित्त सत्कार

सकाळ वृत्तसेवा
सावंतवाडी, ता. २७ ः दशावतारी नाट्य कलाकारांचा गौरव क्वचितच होत असतो. या नाट्यकलेकडे पाहण्याचा दृष्टिकोन बदलायला हवा. ही कला वृद्धिंगत होण्यासाठी प्रयत्न व्हावेत. आज झालेल्या गौरवाने मी भारावलो आहे. येणाऱ्या काळात गोव्यामध्ये मोठ्या प्रमाणात दशावतारी नाट्यप्रयोग सादर करण्याचा मनोदय आहे, असे कलावंत झिलू गोसावी यांनी सांगितले.
वेंगुर्ले येथील अमृतनाथ सिद्धेश्वर दशावतार नाट्यमंडळाचे निर्माते झिलू गोसावी यांचा गोव्यातील ब्रह्मा करमळी, सत्तरी येथे गौरव करण्यात आला. गोव्याचे नामवंत शिवव्याख्याते आणि सामाजिक कार्यकर्ते ॲड. शिवाजी देसाई यांच्या हस्ते श्री शांतादुर्गा देवस्थानच्या वर्धापन दिनानिमित्त हा सत्कार सोहळा झाला. श्री. गोसावी यांनी आजवर २५० दशावतारी नाटकांची निर्मिती केल्याबद्दल त्यांचा हा विशेष सन्मान करण्यात आला.
याप्रसंगी ॲड. देसाई म्हणाले, ‘‘दशावतार म्हणजे भगवान विष्णूंचे दहा अवतार असून, दशावतारी नाट्यकलेच्या माध्यमातून विष्णूंच्या विविध अवतारांतून निर्माण झालेल्या घटनांचे आध्यात्मिक प्रगटीकरण आणि प्रबोधन होत असते. दशावतारी नाट्यकला ही कोकण, महाराष्ट्र आणि गोव्याची उज्ज्वल हिंदू संस्कृती दर्शवणारी परंपरा आहे. या कलेतून आध्यात्मिक उन्नती साधणे आवश्यक असून, आज ही नाट्यपरंपरा टिकवणे गरजेचे आहे.’’
ॲड. देसाई यांच्या हस्ते शाल, श्रीफळ आणि मानचिन्ह देऊन गोसावी यांचा गौरव करण्यात आला. यावेळी जयसिंग देसाई, रामराव देसाई, अरविंद देसाई यांची उपस्थिती होती. याप्रसंगी अमृतनाथ सिद्धेश्वर दशावतार नाट्य मंडळ, म्हापण, वेंगुर्ले यांच्यातर्फे ‘कली आणि मच्छिंद्रनाथ युद्ध’ हा दशावतारी नाट्यप्रयोग सादर केला. या नाट्यप्रयोगात महेश गोसावी व त्यांच्या सहकाऱ्यांनी सहभाग घेतला. या नाट्यप्रयोगास प्रेक्षकांचा उत्स्फूर्त प्रतिसाद लाभला. जयसिंग देसाई यांनी आभार मानले.