66573
66626

मुसळधार पावसामुळे जनजीवन विस्कळीत

गड, जानवली नद्यांना पूर; कणकवलीत झाड कोसळून घराचे नुकसान

सकाळ वृत्तसेवा
कणकवली, ता. २७ ः आठ दिवसांपासून होत असलेल्‍या संततधार पावसामुळे मे महिन्यातच जानवली आणि गड नदीपात्रात पूरसदृश स्थिती नागरिकांना पाहायला मिळाली. दरम्‍यान, मुसळधार पावसामुळे जनजीवन विस्कळीत झाले आहे. ठिकठिकाणी वीज तारांवर फांद्या आणि झाडे कोसळल्‍याने तब्‍बल बारा तास वीज पुरवठा ठप्प होता. जानवली बौद्धवाडीत घरावर फांदी कोसळल्‍याने घराचे मोठे नुकसान झाले आहे.
गेले सहा दिवस मॉन्सूनपूर्व सरी जोरदार बसरल्‍या. त्‍यानंतर गेले दोन दिवस कणकवली तालुक्‍यात मॉन्सूनने जोरदार हजेरी लावली आहे. त्‍यामुळे मे महिन्यातच जानवली आणि गड नदीपात्र आज दुथडी भरून वाहत होते. याखेरीज ओढे, नाल्‍यांनाही जोरदार पाणी आले होते.
आज सकाळी सहाच्या सुमारास जोरदार वादळी वारे सुटले होते. यात जानवली बौद्धवाडी येथील अनिल कदम यांच्या घरावर झाडाची फांदी कोसळून त्‍यांचे सुमारे पन्नास हजार रुपयांचे नुकसान झाले. याखेरीज तालुक्‍यात ठिकठिकाणी वीज तारांवर झाडाच्या फांद्या, तसेच काही ठिकाणी झाडे कोसळल्‍याने काल (ता.२६) रात्री अकराच्या सुमारास तालुक्‍याचा वीज पुरवठा बंद झाला.
---
आठवडा बाजारावरही परिणाम
आज सकाळपासून वीज तारांवर पडलेली झाडे, फांद्या हटविण्याचे काम महावितरणकडून सुरू करण्यात आले. त्‍यामुळे दुपारी एक वाजल्‍यानंतर संपूर्ण तालुक्‍याचा वीज पुरवठा सुरळीत करण्यात महावितरणला यश आले. दुपारी एक वाजेपर्यंत पावसाचा जोर कायम होता. त्‍याचा मोठा परिणाम कणकवलीच्या आठवडा बाजारावर झाला. दुपारी दोन वाजल्‍यानंतर पावसाचा जोर ओसरला, त्‍यामुळे आठवडा बाजारात खरेदीसाठी गर्दी झाली होती.