66579

देवगडमध्ये मॉन्सूनची दमदार सलामी

किनाऱ्याला झोडपले; रेंबवलीत घरावर झाड पडून नुकसान

सकाळ वृत्तसेवा
देवगड, ता. २७ ः तालुक्याच्या किनारी भागांत यंदाच्या मॉन्सूनने दमदार सलामी दिली. सलामीलाच १८० मिलिमीटर इतका पाऊस बरसला. वादळी वाऱ्यासह जोराच्या झालेल्या पावसाने आज पहाटेच्या सुमारास तालुक्यातील रेंबवली येथील एका घरावर शेवग्याचे झाड पडून सुमारे १० हजारांचे नुकसान झाले. महसूल यंत्रणेने नुकसानीची माहिती घेतली. दरम्यान, यंदाच्या हंगामात मॉन्सूनपूर्व पाऊस मिळून आतापर्यंत एकूण ५८८ मिलिमीटर इतकी पावसाची नोंद झाली.
गेले काही दिवस तालुक्याच्या किनारी भागाला मॉन्सूनपूर्व पावसाने चांगलेच झोडपून काढले होते. त्यानंतर मॉन्सूनचे तालुक्यात दमदार आगमन झाले. सोमवारी (ता. २६) सायंकाळसह रात्रीपासून आज सकाळपर्यंत पावसाच्या दमदार सरी बरसल्या. मॉन्सूनने १८० मिलिमीटर इतक्या पावसाची दमदार सलामी दिली. पावसाबरोबरच अधूनमधून सुटणारा वादळी वारा नुकसानीस कारणीभूत ठरत आहे. किनारी भागांत अवकाळी पावसाच्या जोरदार सरी बरसत आहेत. आकाशात ढग काळवंडलेले असल्याने केव्हाही जोराचा पाऊस सुरू होईल, अशी शक्यता असते. वादळी वाऱ्यासह बरसणाऱ्या पावसामुळे तालुक्यातील रेंबवली येथील एका घरावर शेवग्याचे झाड पडून सुमारे दहा हजारांचे नुकसान झाले. नुकसानीची महसूल यंत्रणेने माहिती घेतली.
---
ग्रामीण भागांतील नद्यांना पूर
सतत पडणाऱ्या पावसामुळे ग्रामीण भागातील नद्यांना पूर आला आहे. पावसामुळे देवगड जामसंडे शहरासह ग्रामीण भागातील विद्युत पुरवठा अधूनमधून खंडित होत असतो. मॉन्सूनने तालुक्याचा बहुतांश भाग व्यापला असून, शेतकरी पेरणीच्या कामाला लागले आहेत.