पिंगुळीत सोमवारी
''कोमसाप''ची सभा
कुडाळः कोकण मराठी साहित्य परिषद सिंधुदुर्ग जिल्हा कार्यकारी मंडळाची सभा सोमवारी (ता. २) सकाळी ११ वाजता येथील श्री देवी भद्रकाली वाचनालय गुढीपूर-पिंगुळी येथे निमंत्रित केली आहे. मागील सभेचे इतिवृत्त वाचन, साहित्यिक, सांस्कृतिक, आर्थिक कार्य अहवाल आढावा, अध्यक्षांच्या परवानगीने आयत्या वेळच्या विषयावर चर्चा करण्यात येणार आहे. सर्व पदाधिकारी व सदस्यांनी उपस्थित राहावे, असे आवाहन ‘कोमसाप’ जिल्हाध्यक्ष मंगेश मसके, सचिव विठ्ठल कदम यांनी केले आहे.
..................
शिरगांव येथे आज
दिव्यांग बांधव मेळावा
देवगडः तालुक्यातील शिरगांव येथील पुंडलिक अंबाजी कर्ले महाविद्यालयात उद्या (ता.30) सकाळीं 10 ते दुपारी 2 या वेळेत शिरगाव गावातील दिव्यांग बांधवांचा मेळावा आयोजित केला आहे. शिरगाव, साळशी, कुवळे, वळिवंडे, तोरसोळे, चाफेड आदी गावातील दिव्यांगासाठी हा मेळावा आहे. यावेळी गरजुंनी उपस्थित राहण्याचे आवाहन करण्यात आले आहे. एक जून हेलन किलर डे व अहिल्याबाई होळकर यांच्या दिनाचे औचित्य साधून शिरगाव येथील पुंडलिक अंबाजी कर्ले महाविद्यालय आणि ग्रामपंचायत शिरगांव यांच्या संयुक्त विद्यमाने जिल्हा दिव्यांग पुनर्वसन केंद्र सिंधुदुर्ग आणि सिंधुदुर्ग साईकृपा अपंगशक्ती बहुउद्देशीय शिक्षण संस्था कसाल यांच्यावतीने हा मेळावा घेण्यात येणार आहे. मेळाव्यामध्ये सभासद नोंदणी, ऑनलाईन प्रमाणपत्र, रेल्वेपास, पेन्शन योजना, स्वावलंबन कार्ड, शिलाई यंत्र, बालसंगोपन, घरघंटी, घरकुल आदी योजनांची माहिती दिली जाईल. गरजू साहित्याची नोंदणी केली जाणार आहे. तसेच कमी दृष्टि, अर्धांगवायू, अपघात यामुळे आलेल्या दिव्यांगाची नोंद केली जाणार आहे. व ऑनलाईन नोंदणी केली जाईल. त्यासाठी स्वावलंबन कार्ड, अपंग प्रमाणपत्र, आधारकार्ड, रेशनकार्ड, पासपोर्ट छायाचित्र, 50 हजारच्या आतील उत्पन्न दाखला, रहिवाशी दाखला, शाळा सोडल्याचा किंवा जन्म दाखला, बँक पासबुक आदी कागदपत्रे असल्यास येताना सोबत आणावीत.