‘आसमंत फाउंडेशन’तर्फे
अनवट रागांची सुरेल मालिका
सकाळ वृत्तसेवा
रत्नागिरी, ता. २ : भारतीय शास्त्रीय संगीत ही अशी कला आहे की, ती आबालवृद्धांना सामावून घेते. ही संगीतशैली अंतःकरणात सुसंवाद निर्माण करते. या प्रवासाचा एक भाग म्हणून सहज ऐकायला न मिळणारे, क्वचित गायले जाणारे अनवट राग एकदा उजळवण्याचा प्रयत्न आसमंत बेनवोलन्स फाउंडेशन करणार आहे. या अंतर्गत अनुश्रुती सुरेल मालिका प्रसारित केली जाणार असल्याची माहिती संस्थापक नंदकुमार पटवर्धन यांनी दिली. ‘आसमंत’ सादर करणार आहे ‘अनुश्रुती’ एक अशी शृंखला, जी दुर्लक्षित रागांना नवजीवन देईल आणि संगीताच्या व्यापकतेत एक नवा स्वर भरून काढेल. दर महिन्याच्या पहिल्या गुरूवारी या रागांच्या दृकश्राव्य फिती प्रसारित होणार आहेत. आसमंत गेली अनेक वर्षे रत्नागिरीतील समाजकार्य क्षेत्रातील अग्रेसर संस्था आहे. आसमंतचे रत्नागिरीतील जैवविविधता उद्यान आणि वार्षिक साजरा होणारा सागर महोत्सव निसर्ग, पर्यावरण संवर्धन इत्यादी क्षेत्रामध्ये मोठे योगदान देत आहेत. आसमंत मुलं, शास्त्रीय संगीत आणि निसर्ग या तिघांचा सुंदर संगम घडवून, एका चांगल्या, सुसंवादपूर्ण विश्वनिर्मितीचा प्रयत्न करत आहे. भारतीय शास्त्रीय संगीतशैली ही भारताची वेगळी ओळख आहे. शास्त्रीय संगीताचा अनुभव ध्यानासारखाच तुम्हाला या विश्वाच्या निर्मात्याच्या सान्निध्यात नेणारा असतो. याकरिता शास्त्रीय अनवट रागांची मालिका प्रसारित करण्याचे ठरवले आहे. यातील तीन राग आतापर्यंत चित्रीत झाले आहेत. यामध्ये अजून गायकांना सहभाग घ्यायचा असल्यास पटवर्धन यांच्याशी संपर्क साधावा, असे आवाहन केले आहे.