swt25.jpg
67665
मुणगेः भगवती वाचनालयामध्ये पुण्यश्लोक अहिल्याबाई होळकर यांच्या त्रिशताब्दी जयंतीनिमित्त प्रतिमेस पुष्पहार अर्पण करताना अध्यक्ष गोविंद सावंत. सोबत संजय परुळेकर, धर्माजी आडकर, निषाद परुळेकर, विजय पडवळ, सरिता गुरव आदी.

अहिल्यादेवी होळकरांचे कार्य अद्वितीय
गोविंद सावंतः मुणगे वाचनालयात त्रिशताब्दी जयंती कार्यक्रम
सकाळ वृत्तसेवा
मुणगे, ता. १ः राजमाता अहिल्याबाई होळकर यांनी धर्म, समाज, संस्कृती व राजकारण या क्षेत्रामध्ये अद्वितीय कार्य करून आदर्श प्रस्तापित केला. ‘न्यायाची प्रतिमूर्ती’ असलेल्या अहिल्यादेवींची त्रिशताब्दी जयंती साजरी करताना प्रत्येकाने त्यांचा आदर्श आपल्या जीवनात उतरविण्याचा संकल्प करावा, असे मत भगवती वाचनालयाचे अध्यक्ष गोविंद सावंत यांनी व्यक्त केले. येथील भगवती वाचनालयामध्ये अहिल्यादेवींच्या त्रिशताब्दी जयंती कार्यक्रमात ते बोलत होते.
मुणगे भगवती वाचनालयामध्ये अहिल्याबाई होळकर यांचा त्रिशताब्दी जयंती कार्यक्रम शनिवारी (ता. ३१) आयोजित केला. यावेळी ग्रंथालयाचे अध्यक्ष सावंत, पदाधिकारी तसेच वाचनालयाचे वाचक उपस्थित होते. कार्यक्रमाच्या सुरुवातीला अध्यक्ष सावंत यांच्या हस्ते अहिल्याबाई यांच्या प्रतिमेस पुष्पहार अर्पण करून अभिवादन करण्यात आले.
श्री. सावंत पुढे म्हणाले, ‘‘अहिल्याबाई होळकर यांनी आपल्या कालखंडात हिंदूंच्या मंदिरांचे संरक्षण आणि मुघल साम्राज्याने तोडलेल्या मंदिरांची पुनर्स्थापना केली. हिंदू धर्म टिकविण्यासाठी मुघल साम्राज्याविरोधात लढा दिला. त्यांचे कार्य व विचार प्रेरणादायी आहेत. विद्यार्थ्यांनी व वाचनप्रेमीनी त्यांचा इतिहास वाचला पाहिजे.’’
इतर मान्यवरांनी अहिल्याबाई होळकर यांच्या जीवनकार्याबद्दल विचार मांडले. यावेळी वाचनालयाचे कार्यकारिणी सदस्य संजय परुळेकर, धर्माजी आडकर, देवी भगवती देवस्थान समितीचे सचिव निषाद परुळेकर, भगवती विविध कार्यकारी सेवा सोसायटीचे कार्यकारिणी सदस्य विजय पडवळ, वासंती पुजारे, श्रीमती प्रभात सावंत तसेच विविध कार्यकारी सहकारी सेवा सोसायटीच्या सचिव सरिता गुरव, वाचनालयाचे कर्मचारी विश्वास मुणगेकर, सोमनाथ रुपे, सौ. मुणगेकर आदी उपस्थित होते.