‘सम्राट संगीत सितारा’
स्पर्धा १४ जूनपासून
सकाळ वृत्तसेवा
सावंतवाडी, ता. २ः सम्राट क्लब इंटरनॅशनल गोवा राज्य आयोजित ‘सम्राट संगीत सितारा’ ही गोव्यातील प्रतिष्ठेची स्पर्धा म्हणून ओळखली जाते. भारतीय शास्त्रीय संगीतावर आधारित गायन स्पर्धेचे यंदाचे हे एकोणीसावे वर्ष असून, यावर्षी १४ जूनपासून या स्पर्धेला प्रारंभ होत आहे. उत्तर गोवा, दक्षिण गोवा, सावंतवाडी व बेळगांव अशा विविध भागांत होणाऱ्या प्राथमिक फेरीतून स्पर्धक निवडले जातील.
प्राथमिक फेरीतून प्रत्येकी ३ असे १२ स्पर्धक निवडले जाणार आहेत. त्यांची उपांत्य फेरी २९ जूनला सकाळी १० वाजता कुडचडे रवींद्र भवनात होणार आहे. या उपांत्य फेरीतून ६ स्पर्धकांची निवड अंतिम फेरीसाठी केली जाणार आहे. महाअंतिम फेरी ६ जुलैला सायंकाळी ४ वाजता साखळी रवींद्र भवनात घेण्यात येणार आहे. या सोहळ्यास महागुरु म्हणून शास्त्रीय गायिका विदुषी डॉ. अलका मारुलकर तर प्रमुख पाहुणे म्हणून गोव्याचे मुख्यमंत्री डॉ. प्रमोद सावंत यांची उपस्थिती लाभणार आहे. विजेत्यांना प्रथम २५०००, चषक व सोन्याचे नाणे, द्वितीय २००००, चषक व सोन्याचे नाणे, तृतीय १५०००, चषक व सोन्याचे नाणे तसेच प्रत्येकी ५ हजार रुपयांची तीन उत्तेजनार्थ पारितोषिके व गणपतीची चांदीची फ्रेम अशी बक्षिसे देण्यात येतील. पहिली प्राथमिक फेरी १४ जूनला सकाळी ९.३० वाजता गोठोसकर मंगल कार्यालय सावंतवाडी येथे होणार आहे. नावनोंदणी निःशुल्क असून नोंदणी अर्ज शुक्रवारपूर्वी (ता. ६) आयोजकांकडे सुपूर्द करावा. ही स्पर्धा १४ ते २५ वर्षे वयोगटातील कलाकारांसाठी असून स्पर्धकांना आपल्या वयाचा योग्य दाखला सादर करावा लागेल. स्पर्धेत हिंदी, मराठी व कोकणी यापैकी कोणत्याही भाषेत राग चीज, ख्याल, बंदिश, छोटा ख्याल सादर करता येईल. सावंतवाडी, कुडाळ, खेड, दापोली, ओरोस, मालवण, कणकवली, चिपळूण, पुणे, मुंबई, सांगली, मिरज व संपूर्ण महाराष्ट्रातील स्पर्धकांनी मोठ्या संख्येने सहभागी व्हावे, असे आवाहन सम्राट क्लब माशेलचे अध्यक्ष मंगेश गांवकर व सम्राट संगीत सितारा चेअरमन अमोल बेतकीकर यांनी केले आहे. सावंतवाडी येथे होणाऱ्या प्राथमिक फेरीसंबंधी अधिक माहिती आणि नावनोंदणीसाठी डॉ. रश्मिना आमोणकर यांच्याकडे संपर्क साधावा.