संगमेश्वरात तीन एक्स्प्रेस थांबवा
फेसबुक ग्रुपची मागणी ; खासदार राणेंना साकडे
सकाळ वृत्तसेवा
संगमेश्वर, ता. २ ः संगमेश्वर रेल्वेस्थानक येथे तीन एक्स्प्रेस गाड्या थांबवा, अशी मागणी निसर्गरम्य चिपळूण-संगमेश्वर (रेल्वे) फेसबुक ग्रुपतर्फे खासदार नारायण राणे यांच्याकडे करण्यात आली आहे. याबाबत दिल्लीत गेल्यानंतर रेल्वेमंत्र्यांकडे पाठपुरावा करू, असे आश्वासन राणे यांनी दिले.
संगमेश्वर रोड रेल्वेस्थानकात मडगाव, जामनगर, पोरबंदर या तीन एक्स्प्रेसना थांबा मिळावा यासाठी गेल्या दीड वर्षापासून प्रयत्न केले आहेत. कोकण रेल्वेच्या अधिकाऱ्यांना निवेदने दिली. निसर्गरम्य चिपळूण-संगमेश्वर (रेल्वे) फेसबुक ग्रुपच्या पुढाकाराने को. रे. च्या मुख्याधिकाऱ्यांना भेट दिली. भरघोस उत्पन्न मिळवून देणाऱ्या संगमेश्वर रोड स्थानकावर अन्याय होत आहे. ऐतिहासिक महत्त्व अधोरेखित करून थांबा मिळावा म्हणून वारंवार विनंती केली; परंतु नेहमी केंद्रीय रेल्वेबोर्डाकडे बोट दाखवत त्यांच्याकडून मंजुरी मिळण्यास उशीर होत असल्याचे कोरेकडून सांगण्यात येते आहे. संघटनेतर्फे दीपक पवार, संतोष पाटणे, मुकुंद सनगरे व अशोक मुंडेकर यांनी हा विषय खासदार नारायण राणे यांची मुंबईत भेट घेऊन मांडला. त्या वेळी दिल्ली येथे रेल्वेमंत्र्यांची भेट घेऊन तिन्ही गाड्यांच्या थांब्याची मागणी पूर्ण होईल, असे राणे यांनी आश्वासन दिले. त्यामुळे रेल्वेगाड्या थांबण्याची प्रतीक्षा लवकरच संपेल, अशी आशा निर्माण झाली आहे.