संकल्प संस्थेतर्फे
गरजूंना मदत
खेड : शैक्षणिक, सामाजिक, कला, क्रीडाक्षेत्रात सामाजिक बांधिलकीतून नवनवे उपक्रम राबवणाऱ्या मुंबई येथील संकल्प सामाजिक संस्थेने यंदाही तालुक्यातील गरजू विद्यार्थ्यांना मदतीचा हात देऊन शिक्षणाच्या मुख्य प्रवाहात आणण्याचा निर्णय घेतला आहे. त्यानुसार यंदाही होतकरू विद्यार्थ्यांना मोफत शैक्षणिक साहित्याचे वितरण करण्याचा निर्णय घेतला आहे. दानशूर व्यक्तींच्या माध्यमातून निधी संकलन करत गरजू विद्यार्थ्यांना शिक्षणासाठी मदतीचा हात दिला जात आहे. दरवर्षी ५००हून अधिक गरजू विद्यार्थ्यांना मोफत शैक्षणिक साहित्य वाटप केले जाते. यंदाही ३५० हून अधिक गरजू विद्यार्थ्यांना शैक्षणिक साहित्य वितरित करून शिक्षणापासून वंचित राहणाऱ्या गरजू विद्यार्थ्यांना मुख्य प्रवाहात आणले जाणार आहे. वस्तूंसह आर्थिक स्वरूपात मदतीसाठी केतन शिंगरे, सुदर्शन जाधव यांच्याशी संपर्क साधावा, असे आवाहन करण्यात आले आहे.
---
आपत्ती व्यवस्थापनची
भरणेत बैठक
खेड : भरणे येथील श्री काळकाई देवी मंदिराच्या सभागृहात भरणे मंडल अधिकारी उमाकांत देशमुख यांच्या अध्यक्षतेखाली आपत्ती व्यवस्थापन आढावा बैठक झाली. बैठकीत स्थानिक भागातील संभाव्य आपत्कालीन परिस्थितीबाबत समस्या मांडण्यात आल्या. देशमुख यांनी सर्व संभाव्य आपत्कालीन परिस्थितीची माहिती तहसीलदार सुधीर सोनावणे यांना देण्यात येईल, असे स्पष्ट करत योग्य ती कार्यवाही करण्याबाबत सूचित केले. आरोग्य विभागाचे प्रतिनिधी बाईत यांनीही मार्गदर्शन केले. महामार्ग विभागाच्या अधिकाऱ्यांनी पावसाळ्यात वाहतूक करताना सतर्क राहण्याच्या सूचना दिल्या. या प्रसंगी सेवानिवृत्त शिक्षणविस्तार अधिकारी सुनील सावंत, नवभारत हायस्कूलचे प्राचार्य महेश बोघे, कशेडी गावणकर शाळेचे मुख्याध्यापक प्रभाकर कोळेकर, प्राथमिक शिक्षक भांबड, कळंबणी, उथळे, नातूनगर येथील सरपंचांसह भरणे मंडलातील ७ सजेअंतर्गत २९ गावांतील सरपंच आदी उपस्थित होते.
---
अहिल्याबाई होळकर
जयंती साजरी
चिपळूण : पुण्यश्लोक अहिल्याबाई होळकर यांची जयंती जिजाऊ ब्रिगेड संघटना व अहिल्याबाई होळकर महिला मंडळ यांच्या संयुक्त विद्यमाने साजरी करण्यात आली. या प्रसंगी मान्यवरांना झाडाचे रोप देऊन त्यांचा सन्मान करण्यात आला. दहावी उत्तीर्ण झालेल्या विद्यार्थ्यांचा गौरव करण्यात आला तसेच चिपळूणमधील वेगवेगळ्या क्षेत्रांमध्ये काम करणाऱ्या महिलांचे स्वागत करण्यात आले. या वेळी गीतांजली कदम, रेहाना बिजले, स्नेहल चव्हाण, स्वाती देवळेकर, रंजिता ओतारी, विभावरी जाधव, श्रद्धा फडके आदी उपस्थित होते.