रायगडावर रविवारपासून ‘शिवराज्याभिषेक’ सोहळा
सुनील पवारः विविध धार्मिक, सांस्कृतिक कार्यक्रमांचे आयोजन
सकाळ वृत्तसेवा
कुडाळ, ता. ३ ः रयतेचे राजे छत्रपती शिवाजी महाराज यांचा ३५२ वा श्री शिवराज्याभिषेक दिन सोहळा (हिंदू साम्राज्य दिन) ज्येष्ठ शुद्ध त्रयोदशी या तिथीला ८ व ९ जूनला किल्ले रायगडावर मोठ्या जल्लोषात लाखो मावळ्यांच्या उपस्थितीत साजरा केला जाणार आहे. दोन्ही दिवस रायगडावर धार्मिक, सांस्कृतिक कार्यक्रमांचे केले आहे, अशी माहिती शिवराज्याभिषेक दिनोत्सव सेवा समिती किल्ले रायगड अध्यक्ष सुनील पवार यांनी दिली.
या सोहळ्याचे स्वागताध्यक्ष रोजगार हमी खार भूमी विकास मंत्री भरतशेठ गोगावले असून, निमंत्रक दिनोत्सव सेवा समिती अध्यक्ष पवार, सनी ताठेले, समीर वारेकर, राजू देसाई तर आयोजक संलग्न संस्था आणि त्यांचे प्रतिनिधी आहेत. रविवारी (ता. ८) सकाळी ९ वाजता श्री गढदेवता सिकाई पूजन (श्री शिकोई मंदिर), १० वाजता श्री छत्रपती शंभू महाराज जयंती उत्सव (राजसदर) शंभुराई पूजन, शंभू व्याख्यान, दुपारी १२ वाजता महादरवाजा पूजन आणि तोरण, १२.३० वाजता श्री जगदीश्वर पूजन व अभिषेक, श्री व्याडेश्वर पूजन व अभिषेक, श्री भवानी देवी पूजन व अभिषेक, १ वाजता महादरवाजा ध्वजारोहण, सायंकाळी ५ वाजता श्री शिवतुलादान, पारंपरिक गोंधळ, रात्री ९.३० वाजता सांस्कृतिक कार्यक्रम, ज्येष्ठ शुद्ध त्रयोदशी श्री शिवराजाभिषेक दिनानिमित्त सोमवारी (ता. ९) सकाळी ७ वाजता ध्वजारोहण सोहळा (नगारखाना), श्री शिवराजाभिषेक सोहळा (राजसदर) सुवर्णहोन, शिवराई पूजन, १०.३० वाजता श्री शिवसन्मान सोहळा (रणमर्द मुरारबाजी देशपांडे घराणे), ११ वाजता श्री शिव पालखी सोहळा, ११.३० वाजता महाप्रसाद, दुपारी २ वाजता गड स्वच्छता मोहीम व सांगता होणार आहे. या सोहळ्यासाठी लाखो मावळे गडावर येणार आहेत. या सोहळ्यासाठी राज्य शासन सांस्कृतिक विभागाचे सहकार्य लाभले आहे, असे पवार यांनी सांगितले. अधिक माहितीसाठी रंजन गावडे यांच्याशी संपर्क साधावा, असे आवाहन केले आहे.