rat3p4.jpg
67835
गुहागरः प्रो कबड्डी लीगमध्ये निवड झालेला पिंपरचा शुभम रहाटे.
------------

पिंपरच्या शुभम रहाटेची
प्रो कबड्डीमध्ये वर्णी
गुहागर, ता. ३ : तालुक्यातील पिंपर गावचा शुभम रहाटे याची प्रो कबड्डी लीगमधील ‘बंगळुरू बुल्स’ संघात निवड झाली आहे. स्थानिक पातळीवर श्री विठ्ठलाईदेवी क्रीडा मंडळ अडूर व व्यावसायिक स्तरावर मुंबईतील विजय क्लब संघांचे प्रतिनिधित्व करताना त्याने उत्कृष्ट खेळ केला आहे.
प्रो कबड्डी लीग आज देशातील सर्वात मोठ्या क्रीडा लीगपैकी एक मानली जाते. या हंगामासाठी ३१ मे आणि १ जून रोजी मुंबईत खेळाडूंचा लिलाव झाला. त्यामध्ये ''बंगळुरू बुल्स'' संघामार्फत शुभमची निवड झाली. शुभम याने मेहनतीच्या जोरावर तालुका, जिल्हा, राज्य आणि आता राष्ट्रीय पातळीवर चमकदार कामगिरी केली आहे. गुहागर तालुक्यातील पहिला खेळाडू शुभमच्या रूपाने प्रो कबड्डीमध्ये दाखल झाल्याने खेळाडूंमध्ये आता नवचैतन्य आले आहे. हा खेळाडू केवळ स्वतःचीच नाही तर संपूर्ण तालुक्याची ओळख प्रो कबड्डीमध्ये नेतो आहे. ग्रामीण भागातूनही जागतिक पातळीवरचा खेळ खेळता येतो, हे त्याने सिद्ध केलं आहे. त्याच्या दमदार खेळाने आता थेट प्रो कबड्डी लीगमध्ये आपल्या खेळाची चुणूक दाखवण्यासाठी तो सज्ज झाला आहे.

चौकट
कौशल्यामुळे झाली निवड
प्रो लीग कबड्डी स्पर्धेसाठी मुंबईत चाचणी घेण्यात आली. त्यामध्ये राज्यभरातील विविध खेळाडू सहभागी झाले होते. त्यामध्ये शुभम याची तंदुरूस्ती, खेळातील कौशल्य, संरक्षण आणि आक्रमण कौशल्य या मुल्यांकनावर निवड करण्यात आली आहे.