महामार्गावर चार ठिकाणी निवाराशेड
रत्नागिरी, ता. ४ः रत्नागिरी-मिऱ्या ते नागपूर या महामार्गाच्या सुरू असलेल्या कामामुळे या महामार्गावर पूर्वीपासून असलेल्या प्रवासीथांब्यावर निवाराशेड जमीनदोस्त करण्यात आल्या. महामार्गाचे काम सर्वत्र सुरू असल्याने त्या बसथांब्यावर शेडअभावी प्रवाशांना ऊन-पावसाचा मारा झेलत उभे राहण्याची वेळ आली होती; पण सध्या या महामार्गावरील बहुतांश बसथांब्यावर तात्पुरत्या निवाराशेडची व्यवस्था करण्यात आल्याने प्रवासीवर्गातून समाधान व्यक्त केले जात आहे.
पावसाळा सुरू झाल्याने निवाराशेडअभावी प्रवाशांचे हाल होणार होते. त्यामुळे संबंधित ठेकेदार कंपनीने बसथांब्यावर तात्पुरत्या लोखंडी निवाराशेडची उभारणी केली आहे. शहारातील साळवीस्टॉप, जे. के. फाईल्स, कुवारबाव, हातखंबा अशा थांब्यांवर या शेड आता पाहायला मिळत आहेत.