कामगारवर्गाच्या प्रश्नांचे उत्तर
भाजप विचारधारेत ः रवींद्र चव्हाण
सकाळ वृत्तसेवा
रत्नागिरी, ता. ५ : कामगारवर्गाच्या प्रश्नांचे उत्तर भाजप विचारधारेतच आहे. कामगारवर्गासमोर असणाऱ्या असंख्य छोट्या-मोठ्या प्रश्नांचं समाधान केवळ भाजप विचारधारेतच आहे, हे कामगारवर्गाला भाजपकडे आकृष्ट करण्यात यशस्वी ठरत आहे, असे प्रतिपादन भाजप कार्यकारी प्रदेशाध्यक्ष आमदार रवींद्र चव्हाण यांनी केले. अखिल भारतीय कामगार कर्मचारी संघाच्या अध्यक्षपदी नेमणूक झाल्यानंतर आयोजित कार्यक्रमात ते बोलत होते.
या कार्यक्रमात शिव वाहतूक सेनेच्या दिग्गज नेते, जिल्हाध्यक्षांनी ''कमळ'' हाती घेतले. इंडिगो एजाईल एअरपोर्ट प्रायव्हेट लि. मुंबई विमानतळ, बीडब्लूएफएस मुंबई विमानतळ, एअर इंडिया, स्पाईसजेट एअरलाईन अशा विविध वाहतूक कामगार संघटनांचे अध्यक्ष व पदाधिकाऱ्यांनीदेखील भाजपचा ध्वज हाती घेतला. कामगारवर्गाच्या समस्या सोडवण्यासाठी कामगारांच्या खांद्याला खांदा लावून पाठपुरावा करेन, अशी ग्वाही आमदार चव्हाण यांनी कामगारांना दिली. या प्रसंगी भारतीय कामगार कर्मचारी संघाचे कार्याध्यक्ष जितेंद्र राऊत, सरचिटणीस सुहास माटे यांच्यासह अनेक पदाधिकारी उपस्थित होते.