वर्ष उलटूनही पूरग्रस्त भरपाईच्या प्रतीक्षेत
ठाकरे शिवसेनेने वेधले लक्ष ः जिल्हाधिकाऱ्यांसोबत चर्चा
सकाळ वृत्तसेवा
सिंधुदुर्गनगरी, ता. ५ ः जिल्ह्यात जुलै २०२४ मध्ये उद्‌भवलेल्या पूरस्थितीमुळे अनेक घरे, मांगर कोसळले असून, नागरिक व शेतकऱ्यांचे कोट्यवधींचे नुकसान झाले होते. मात्र, वर्ष होत आले तरी त्या नुकसानग्रस्तांना नुकसान मिळाली नाही. एकट्या ओरोस-ख्रिश्चनवाडी येथील ९८ घरांच्या नुकसानीची एकूण ३ कोटी ४१ लाख रुपयांची भरपाई शासनाकडून प्रलंबित आहे. राज्य सरकारकडे पाठपुरावा करून ही भरपाई लवकरात लवकर मिळवून देण्यात यावी, अशी मागणी ठाकरे शिवसेनेचे माजी आमदार वैभव नाईक यांनी जिल्हाधिकारी यांच्याकडे केली आहे.
जिल्ह्यातील शेतकऱ्यांचे विविध प्रश्नांबाबत माजी आमदार वैभव नाईक, राजन तेली, सतीश सावंत यांच्यासह ठाकरे शिवसेनेच्या पदाधिकाऱ्यांनी जिल्हाधिकारी यांचे लक्ष वेधले आहेत. यावेळी त्यांनी कृषी यांत्रिकीकरण योजनेंतर्गत शेतकऱ्यांना कृषी अवजारांचे, ठिबक सिंचनाचे वाटप लॉटरी पद्धतीने केले जात आहे. मात्र, त्यात निवड झालेल्या शेतकऱ्यांना फार्मर आयडी कार्डची अट ठेवली आहे. अनेक शेतकऱ्यांनी दोन महिन्यांपूर्वी फार्मर आयडी कार्ड काढूनही अद्याप त्यांना फार्मर आयडी कार्ड मिळालेले नाही.
आता शेतीचा हंगाम सुरू झाल्यामुळे लॉटरी पद्धतीत निवड झालेल्या शेतकऱ्यांना फार्मर आयडी कार्डची अट काही काळ शिथिल करून कृषी अवजारांचे वाटप करण्यात यावे. तसेच ज्या शेतकऱ्यांनी कृषी अवजारांसाठी अर्ज केले आहेत, त्या सर्वांना कृषी अवजारे मिळण्यासाठी कृषी यांत्रिकीकरण योजनेची व्याप्ती वाढवावी. त्याचबरोबर हवामानातील बदल, अवकाळी पाऊस यामुळे यावर्षीदेखील आंबा, काजू फळपिकांचे नुकसान झाले असून, ३० जून २०२५ पूर्वी फळ पीक विम्याचे टिगर जाहीर करण्याचे आदेश कृषी विभाग व विमा कंपनीला देण्यात यावेत. शेतकऱ्यांना भात शेतीसाठी आवश्यक असलेले युरिया खतदेखील जिल्ह्यात लवकरात लवकर उपलब्ध करण्यात यावे, हत्ती पकड मोहीम राबवावी. हवामान केंद्रे दुरुस्त करावी, अशा मागण्या करत जिल्हाधिकारी यांचे लक्ष वेधले आहेत.