चिपळुणात आज
ठाकरे गटाचा मेळावा
चिपळूण : शिवसेना उद्धव बाळासाहेब ठाकरे पक्षाच्यावतीने ६ जूनला सकाळी १० वाजता शहरातील काविळतळी येथील बांदल हायस्कूल सभागृहात कार्यकर्ता मेळाव्याचे आयोजन केले आहे. या मेळाव्याला पक्षाचे सचिव माजी खासदार विनायक राऊत, आमदार भास्कर जाधव मार्गदर्शन करणार आहेत. चिपळूण तालुका शिवसेना, महिला आघाडी, युवासेनेतर्फे या मेळाव्याचे नियोजन केले जात आहे. या मेळाव्याला जिल्हा संपर्कप्रमुख सहदेव बेटकर, दक्षिण रत्नागिरी जिल्हाप्रमुख दत्ताराम कदम, उत्तर रत्नागिरी जिल्हाप्रमुख बाळा खेडेकर, चिपळूण-संगमेश्वर विधानसभा संपर्कप्रमुख सुरेश कदम हे प्रमुख मार्गदर्शक म्हणून उपस्थित राहणार आहेत. या मेळाव्याला सर्व शिवसेना, महिला आघाडी, युवासेना, पदाधिकारी, आजी-माजी लोकप्रतिनिधी, अंगीकृत संघटनेचे पदाधिकारी, ज्येष्ठ शिवसैनिक व कार्यकर्त्यानी उपस्थित राहावे, असे आवाहन विधानसभा क्षेत्रप्रमुख बाळा कदम यांनी केले आहे.

मेहरून्निसा दलवाईंचा
देवरूखात स्मृतिदिन
साडवली ः हमीद दलवाई यांच्या पश्चात हमीद दलवाई इस्लामिक इन्स्टिट्यूटचे मुस्लिम समाजसुधारणेचे कार्य पुढे नेणाऱ्‍या दलवाई यांच्या पत्नी मेहरून्निसा दलवाई यांचा स्मृतिदिन देवरूख येथे साजरा होणार आहे. ८ जूनला सकाळी ११ ते १२.३० या वेळेत मातृमंदिर साम्यकूल सभागृहात हा कार्यक्रम होणार आहे. या वेळी मुस्लिम समाजासाठी कार्य करणाऱ्या सबाह खान व शमीन शेरे या कर्तृत्ववान महिलांच्या कार्याचा गौरव केला जाणार आहे. मेहरून्निसा दलवाई या मुस्लिम समाजसुधारक, विचारवंत, लेखक, साहित्यिक हमीद दलवाई यांच्या पत्नी होत. त्यांनी हमीद दलवाई यांचे कार्य नेटाने पुढे सुरू ठेवले. हमीद दलवाई यांच्यासारखाच त्यांना समाजाकडून विरोध झाला तरीही त्या डगमगल्या नाहीत. त्यांच्या स्मृतिदिनी समाजसुधारक महिलांचा सन्मान करण्यात येणार आहे. या कार्यक्रमाला हमीद दलवाई इस्लामिक रिसर्च इन्स्टिट्यूटच्या अध्यक्षा इला दलवाई, सामाजिक कार्यकर्ते राजेंद्र बहाळकर, शोभा बागूल व युयुत्सू आर्ते उपस्थित राहणार आहेत.

‘वाचनामुळे विद्यार्थी
जिज्ञासू बनतात’
संगमेश्वर ः विद्यार्थ्यांच्या सर्वांगीण विकासासाठी प्रथम त्यांना वाचनाची आवड लावणे आवश्यक आहे. वाचनामुळे विद्यार्थी अधिक चौकस-जिज्ञासू बनतात, असे प्रतिपादन स. रा. देसाई अध्यापक विद्यालयाचे अध्यापक प्राचार्य सुनील जोपले यांनी केले. माध्यमिक, उच्च माध्यमिक, कला आणि क्रीडाशिक्षकांसाठी फाटक हायस्कूल येथे डाएटतर्फे आयोजित प्रशिक्षणामध्ये ''भाषेची ठळक वैशिष्ट्ये’ या विषयावर ते बोलत होते. शिक्षणामध्ये भाषा का महत्वाची आहे, हे सांगताना जोपले यांनी विविध अभ्यासपूर्ण उदाहरणं दिली. संपूर्ण पाठ हा चर्चात्मक पद्धतीने संपन्न झाल्यामुळे तो अधिक प्रभावी झाला. शिक्षकांनी विद्यार्थ्यांना भाषा विषयांचे ज्ञान देताना मातृभाषेतून शिक्षणाचे महत्व पटवून द्यावे. प्रभावी संवाद कसा साधता येतो, हे सांगताना जोपले यांनी विद्यार्थ्यांना संस्कृतीचे ज्ञान दिल्यास शिक्षण अधिक प्रभावी आणि परिणामकारक ठरेल, असे सांगितले.