नेरुर येथे उद्या महाआरोग्य शिबिर
सकाळ वृत्तसेवा
कुडाळ, ता. ६ ः केंद्राच्या अखिल भारतीय आयुर्वेद संस्थान धारगळ, गोवा तसेच (कै.) यशवंतराव नाईक ग्रामीण रुग्णालय व संशोधन केंद्र नेरूर यांच्यावतीने आणि बॅ. नाथ पै फाउंडेशन फॉर कोकण डेव्हलपमेंट व बॅ. नाथ पै नर्सिंग महाविद्यालय व फिजिओथेरपी महाविद्यालय यांच्या सहकार्याने रविवारी (ता. ८) (कै.) यशवंतराव नाईक ग्रामीण रुग्णालय व संशोधन केंद्र नेरुर येथे सकाळी ९ ते दुपारी २ या वेळेत मोफत आयुर्वेदिक उपचारांचे महाआरोग्य शिबिराचे आयोजन केले आहे. जिल्ह्यातील गरजू रुग्णांनी याचा मोठ्या संख्येने लाभ घ्यावा, असे आवाहन बॅ. नाथ पै शिक्षण संस्थेचे चेअरमन उमेश गाळवणकर व बॅ. नाथ पै फाउंडेशन फॉर कोकण डेव्हलपमेंटच्या अध्यक्षा अदिती पै यांनी केले आहे.
या शिबिरासाठी डॉ. सुजाता कदम, डॉ. प्रशांत ससाने, डॉ. प्रवीण भट, डॉ. विनायक चकोर, डॉ. अंकिता मसुरकर या तज्ञ व अनुभवी डॉक्टरांकडून रुग्ण तपासणी केली जाणार आहे. हृदयरोग, मधुमेह, उच्च रक्तदाब, एलर्जी, अस्थमा, त्वचा विकार, पचनाच्या समस्या, हाडांचे व सांध्यांचे आजार, किडनी विकार, पक्षाघात, वात विकार, मलावरोध, मूळव्याध, भगंदर, बालरोग, स्त्रीरोग, अन्य जुनाट विकार, थायरॉईड, नेत्र तपासणी इत्यादी आजारांवर अनुभवी डॉक्टरांकडून तपासणी व उपचार केले जाणार आहेत. तपासणी दरम्यान विविध आजारावरील औषधे व गोळ्या मोफत दिल्या जाणार आहेत तसेच आवश्यकता भासल्यास एक्स रे व इसीजी केले जाणार आहेत.
गरजू रुग्णांना या शिबिराचा लाभ मिळावा, या दृष्टीने कवठी, वालावल, चेंदवण ,नेरूर, पाट, हुमरमळा, आंदुर्ले, गोवेरी, पिंगुळी या गावांमध्ये नर्सींग महाविद्यालयाच्या विद्यार्थ्यांमार्फत तसेच आशाताईंच्या माध्यमातून शिबिराची माहिती देण्यात आली आहे. रुग्णांनी डॉ. सायली गावडे, प्रा. वैशाली ओटवणेकर, प्रा. शंकर माधव, प्रा. प्रथमेश हरमलकर, अक्षया सामंत यांच्याकडे नाव नोंदणी करावी, असे आवाहन केले आहे.