rat6p20.jpg
N68584
राजापूर ः मृडानी नदीवरून कोसळणारा धबधबा.
rat6p21.jpg
68533
आकर्षक धूतपापेश्‍वर मंदिर.
rat6p22.jpg ः
68534
सभामंडप
rat6p25.jpg ः
68537
कोरीव नक्षीकाम केलेले सभागृहातील लाकडी खांब आणि बांधकाम.
-------------

राजापूरच्या धूतपापेश्वर मंदिराला नवा साज
संवर्धन आणि सुशोभीकरण; ११ कोटीच्या निधीतून कायापालट
सकाळ वृत्तसेवा
राजापूर, ता. ६ : प्राचीन मंदिरांच्या जतन-संवर्धन आणि परिसर विकास कार्यक्रमान्तर्गत राजापूरचे आराध्यदैवत श्री धूतपापेश्‍वरचे प्राचीन मंदिर आणि परिसराचे जतन, संवर्धन आणि सुशोभीकरण करण्यात येत आहे. सद्यःस्थितीमध्ये बांधकाम आणि सुशोभीकरणाचे बहुतांश काम पूर्ण झाले असून, प्राचीन मंदिराला नवा साज चढला आहे. धार्मिक आणि पर्यटनाचा अनोखा संगम अनुभवण्यासाठी भाविकांसह पर्यटकांची पावले या परिसराकडे वळू लागली आहेत.
तालुक्यातील धोपेश्‍वर येथे श्री धूतपापेश्‍वरचे मंदिर मृडानी नदीच्या काठावर आहे. मंदिराचे वैशिष्ट्यपूर्ण बांधकाम आणि मंदिराच्या गाभाऱ्यातील लाकडी बांधकामासह या ठिकाणच्या खांबांवरील कोरीव कामामुळे स्थापत्यशास्त्राची प्रचिती येते. मंदिराच्या पाठीमागून वाहणाऱ्या मृडानी नदीवर उंचावरून कोसळणारा धबधबा या मंदिराच्या परिसराचे निसर्गसौंदर्य अधिक खुलवतो. या मंदिर आणि परिसरातील धार्मिक आणि पर्यटनाचा अनोखा संगम अनुभवण्यासाठी राज्याच्या विविध भागातून मोठ्या संख्येने भाविक दरवर्षी येथे येतात. त्यामुळे मंदिर आणि परिसराचे जतन अन् संवर्धन करण्याची मागणी केली जात होती.
धूतपापेश्‍वर मंदिराच्या सुशोभीकरणाचे काम एमएसआरडीसीच्या माध्यमातून हाती घेण्यात आले. त्यासाठी सुमारे ११ कोटीचा आराखडा तयार करण्यात आला होता. त्याला शासनानेही निधी दिला आहे. या आराखड्याप्रमाणे मंदिराचा जीर्णोद्धार वा पुनर्बांधकाम करणे, मंदिर परिसरातील पर्यटनाच्या भाविकांच्यादृष्टीने सोयीसुविधा निर्माण करणे व इतर सोयीसुविधा संलग्न कामे करणे अशा तीन टप्प्यांमध्ये काम केले आहे.
सद्यःस्थितीमध्ये मंदिर जतन, संवर्धन आणि सुशोभीकरणाचे बहुतांश काम पूर्ण झाले आहे. मंदिराचे आकर्षक अन् वैशिष्ट्यपूर्ण प्रवेशद्वार, प्रशस्त सभामंडप, तेथील लाकडी बांधकामासह लाकडी खांबावर करण्यात आलेले नक्षीदार कोरीव काम, मंदिर परिसरात केलेली आकर्षक विद्युत रोषणाई, भाविकांसाठी बैठक व्यवस्था पर्यटकांचे लक्ष वेधून घेतात. मृडानी नदीवरील धबधबा आणि मंदिराच्या बाजूने हिरवाईने नटलेल्या डोंगर परिसराचे निसर्गसौंदर्य अधिकच खुलवतो.